Ալկոհոլի, ծխախոտի, զենքի և պայթուցիկ սարքերի շրջանառության վերահսկողության ամերիկյան բյուրոյի տնօրենի նախկին տեղակալ Ուիլյամ Հուվերը հեռացել է գերատեսչությունից, հաղորդում է Associated Press-ը:
Գերատեսչության մամուլի ծառայությունից հայտնել են, որ Հուվերի վերջին աշխատանքային օրը եղել է հուլիսի 31-ը: Հուվերի հեռանալը, ըստ մամուլի, կապված է Fast and Furious գործողության տապալման հետ, որի շրջանակներում դեպի Մեքսիկա մաքսանենգության ճանապարհները պարզելու համար հանցագործներին թույլատրում էին զենք գնել ԱՄՆ-ում: Սակայն պաշտոնապես չի հաղորդվում, որ Հուվերի հեռացումը կապ ունի այդ սկանդալի հետ:
Կոնգրեսի Հանրապետական կուսակցության անդամների պատրաստած զեկույցում ասվում է, որ հուվերը եղել է գերատեսչության 5 անդամներից մեկը, որոնք պատասխանատու են եղել այդ գործողության համար:
Հուվերը 2009-2011թթ. եղել է գերատեսչության տնօրենի տեղակալը: 2011թ. հոկտեմբերին, երբ սկանդալը բռնկվեց, նա նշանակվեց այլ պաշտոնի: CNN-ի տվյալներով՝ գերատեսչությունից հեռանալու ժամանակ Հուվերը եղել է նոր տնօրենի տեղակալի խորհրդականը:
Fast and Furious գործողությանը վերաբերող փաստաթղթերի պատճառով կոնգրեսականների և արդարադատության նախարարության միջև կոնֆլիկտ է տեղի ունեցել: Նախարարությունը հրաժարվում էր տրամադրել փաստաթղթերի մի մասը, որից հետո Ներկայացուցիչների պալատը քվեարկեց, որպեսզի արդարադատության նախարար Էրիկ Հոլդերը մեղադրվի Կոնգրեսի նկատմամբ անհարգալից վերաբերմունքի մեջ:
Fast and Furious գործողությունը սկսվել է 2009թ. վերջին: Դրա շրջանակներում հանցագործներին թույլատրվել է ԱՄՆ-ում ձեռք բերել մոտ 2000 միավոր զենք, որից շուրջ 1400-ը չի հաջողվել հետ ստանալ:
