Հայտնի ամերիկացի դերասան Դենի դե Վիտոն խնդրել է ՌԴ նախագահ Վլադիմիր Պուտինին ազատ արձակել Pussy Riot փանք-խմբի աղջիկներին, որոնք ազատազրկման մեջ են հայտնվել ձմռանը Մոսկվայի Հիսուս Փրկչի տաճարում տեղի ունեցած սկանդալից հետո: Դերասանը նման բովանդակությամբ գրառում է կատարել Twitter-ի իր միկրոբլոգում. «Mr Putin… Pussy Riot… set ’em free…»:
Հիշեցնենք, որ 5 աղջիկները փետրվարի վերջին դիմակավորված ներխուժել էին տաճար և խորանի առջև «փանք-աղոթքներ» արել: Նրանց ելույթով տեսանյութը տեղադրվել էր համացանցում և հասարակական մեծ արձագանք ստացել: Աղջիկների դեմ առաջադրվել է խուլիգանության հոդվածով մեղադրանք: Նրանց սպառնում է ազատազրկում` մինչև 7 տարի ժամկետով:
Հիշեցնենք, որ նախօրեին Պուտինը հայտարարել էր, որ նրանց չարժե այդքան խիստ դատել: «Կարծում եմ` նրանք իրենց համար եզրակացություններ կանեն»,- ասել է Պուտինը Լոնդոն ուղևորվելուց առաջ լրագրողների հետ հանդիպման ժամանակ:
Ավելի վաղ աղջիկներին իրենց աջակցությունն են հայտնել Red Hot Chili Peppers, The Who, Franz Ferdinand և Pet Shop Boys խմբերի երաժիշտները, Beastie Boys-ից` Ադամ Հորովիցը, Pulp-ից` Ջարվիս Կոկերը, Սթինգը, Փաթի Սմիթը և Փիթեր Գաբրիելը:
