ԱԺ ԲՀԿ խմբակցության պատգամավոր Ռոբերտ Թովմասյանը ԲՀԿ քաղխորհրդի նիստից հետո պատասխանեց «Առաջին լրատվականի» հարցերին:
– ԲՀԿ-ն սկզբում հայտարարել էր, թե նախագահի թեկնածուի հարցում իր դիրքորոշումը կհայտնի խորհրդարանի ընտրություններից հետո: Մինչդեռ այսօր հայտարարեցիք Ձեր կուսակցության դիրքորոշումը: Ինչո՞վ էր պայմանավորված դա:
– Այսօր կա կոալիցիա և այն կառավարում է երկիրը, կոալիցիայի մաս կազմում է նաև «Բարգավաճ Հայաստան» կուսակցությունը: Տեսնելով երկրի այսօրվա քաղաքական, տնտեսական, ֆինանսական, ռազմական վիճակը` կարող եմ ասել, որ այս որոշումը նույնիսկ անխուսափելի էր: ՀՀ-ն, գիտեք, ինչ վիճակում է գտնվում, ինչ հարևաններ ունի: Եվ եթե հուշագիրը նման տեսքով չստորագրվի, Սերժ Սարգսյանը դրսում շատ ավելի ոչ նախընտրելի վիճակում կլինի, քան ստորագրման դեպքում: Մենք պետք է մտածենք գլոբալ առումով, թե կոալիցիան ինչպես պետք է գործի հետագայում: Այս որոշումը համարում եմ շատ խելամիտ, ժամանակին, որովհետև մենք տեսնում ենք՝ տարբեր երկրներում ինչ է լինում, երբ երկրի ղեկավարը թուլանում է: Իսկ մենք սրանով թև ու թիկունք ենք կանգնում մեր պետականությանը, և չդնենք վտանգներ առաջացնենք:
– Միգուցե ԱԺ ընտրություններից հետո այլ վիճակ կլինի, միգուցե ընդդիմությունը կհաղթի կամ ԲՀԿ-ն իր ասած՝ 50+1 տոկոսները կհավաքի: Այսինքն՝ կլինի այլ խճանկար, և նախագահի հաջորդ ընտրություններում այլ թեկնածուներ լինեն:
– Չեմ կարող ասել՝ կոալիցիա ԱԺ ընտրություններից հետո կստեղծվի, թե ոչ: Գուցե չստեղծվի, կուսակցություններից մեկը շատ բարձր ձայներ տանի և մյուս կուսակցություններին առաջարկ չանի, քանի որ միայնակ կղեկավարի: Ուստի՝ նախօրոք նման բանի մասին խոսելը ճիշտ չէ:
– Այդ դեպքում ի՞նչ իմաստ ուներ այս հայտարարությունը ստորագրել:
– Այնուամենայնիվ, ես հավանական եմ համարում, որ կոալիցիա կստեղծվի, որ ԲՀԿ-ն կլինի կոալիցիայի մեջ: Ես ԲՀԿ-ին այլ կերպ չեմ պատկերացնում, այն կկազմի իշխանության մաս: Սա ամենախելամիտ որոշումն է, որ կայացվեց: