Մեկնարկել է Orange Գրքի մրցանակ 2012-ը

Այսօր Orange-ը հայտարարել է «Orange գրքի մրցանակ 2012» գրքի մրցույթի մեկնարկի մասին: Մրցույթի նպատակն է նաև խթանել հետաքրքրությունն ընթերցանության նկատմամբ, բացահայտել ժամանակակից հայ գրողների ստեղծագործությունները և օրեցօր զարգացող էլեկտրանային մեդիայի միջոցով տարածել դրանք ընթերցողների առավել լայն զանգվածներին: Այս նախաձեռնությամբ Orange-ը նաև միանում է գրքի և ընթերցանության տոնին, քանի որ Երևանն այս տարի հռչակվել է գրքի համաշխարհային մայրաքաղաք: Orange Գրքի մրցանակը կազմակերպվում և իրականացվում է «Հայ գրքի կենտրոն» հասարակական կազմակերպության հետ միասին:
«Ուրախությամբ ենք հայտարարում արդեն երկրորդ Orange Գրքի մրցանակի մեկնարկը: Սա մասնագիտական գրական մրցանակ չէ և չի հավակնում դառնալ այդպիսին: Orange Գրքի մրցանակն ընթերցողի և գրքի սիրահարների մրցանակ է: Ընթերցասեր հանրությունը կկարողանա մասնակից դառնալ մրցանակակիր ստեղծագործությունների ընտրությանը առցանց քվեարակության միջոցով: Այս իրադարձությունը թույլ կտա գտնել և խրախուսել շնորհալի ու օրիգինալ գրողներին, սակայն մեր ամենակարևոր ցանկությունն է ներգրավել ընթերցողների ամենալայն շրջանակներին և նրանց մասնակից դարձնել գրքի այս մեծ տոնին»,- ասաց Orange-ի գլխավոր տնօրեն Բրունո Դյութուան:
Մրցույթին կարող են մասնակցել բոլոր նրանք, ովքեր ստեղծագործում են հայերենով և կներկայացնեն նախկինում չհրատարակված գրական երկ (էլեկտրոնային հանդեսներում, բլոգերում, սոցիալական ցանցերում տեղակայված ստեղծագործությունները համարվում են չհրատարակված):
Մրցույթին կարելի է ներկայացնել գործ հետևյալ 4 ժանրերում` պատմվածք, վեպ, հեքիաթ, պոեզիա: Մասնակցելու համար անհրաժեշտ է մինչև 2012թ. մինչև նոյեմբերի 15-ը հայերենով գրված ստեղծագործությունը և դրա համառոտ բովանդակությունը Word կամ PDF ֆորմատով ուղարկել [email protected] հասցեով:
Ժուրիի անդամները մինչև 2013թ. հունվարի 15-ը կընտրեն առավելագույնը երեք ստեղծագործություն յուրաքանչյուր ժանրում, որոնք կհրապարակվեն Orange-ի պաշտոնական էջում: Բոլոր ընթերցողները հնարավորություն կունենան քվեարկելու իրենց նախընտրած ստեղծագործությունների օգտին Facebook սոցիալական ցանցի միջոցով: Փետրվարի 15-ի կեսօրին կգրանցվի յուրաքանչյուր ստեղծագործության ստացած ձայների քանակը` որպես առցանց քվեարկության վերջնական արդյունք:
Յուրաքանչյուր ժանրում հաղթող ստեղծագործությունը կընտրվի ժյուրիի քվեարկությամբ, ընդ որում առցանց քվեարկության արդյունքները հաշվվում են որպես ժյուրիի մեկ անդամի ձայն: Հատուկ «Ժողովրդական» մրցանակի կարժանանա նաև ընթերցողների քվեարկության արդյունքում առավելագույն թվով ձայներ հավաքած ստեղծագործությունը ` անկախ ժանրից:
«Անցյալ տարվա մեր փորձը ցույց տվեց, որ մեր երկրում մեծ թվով մարդիկ են ստեղծագործում, որոնց գործերը հաճախ մնում են գրասեղանի դարակում` տարբեր պատճառներով: Orange Գրքի մրցանակը հենց նրանց համար է: Այս տարի հատկապես ակնկալում ենք, որ շատ մասնակիցներ պիտի ունենանք ոչ միայն Երևանից, այլ նաև մարզերից և Սփյուռքից, քանի որ առաջին անգամ մրցույթը բաց է նաև Սփյուռքի մեր բարեկամների համար, ովքեր ստեղծագործում են հայերեն,- ասաց «Հայ գրքի կենտրոն» հկ նախագահ Մկրտիչ Մաթևոսյանը:
Հաղթողների անունները կհրապարակվեն 2012թ. փետրվարի 20-ին, մրցանակաբաշխության արարողության ժամանակ: Մրցույթի հաղթողները կստանան վկայականներ, իսկ հաղթող ճանաչված ստեղծագործությունները կհրատարակվեն 500 տպաքանակով: Բոլոր ժանրերում հաղթող ստեղծագործությունների հեղինակներին կշնորհվեն դրամական պարգևներ (500 000-ական դրամ), բացառությամբ «Ժողովրդական մրցանակի»:
Հիշեցնենք, որ Orange Գրքի մրցանակ 2011-ին մասնակցել է 130 ստեղծագործություն, որոնցից հաղթող են ճանաչվել 5-ը վեպ, դրամատիկական գործ/սցենար, պատմվածք, նովել և հեքիաթ ժանրերում:
Ժյուրիի անդամների ցանկը.
 Վահրամ Դանիելյան, գրաքննադատ
 Աննա Սարգսյան, լրագրող
 Անուշ Քոչարյան, լրագրող
 Անի Չիբուխչյան, բլոգեր
 Սիրանուշ Դվոյան, գրաքննադատ
 Արմեն Պատվականյան, խմբագիր
 Սերժ Մելիք Հովսեփյան, թատրոնի ռեժիսոր
 Facebook քվեներ
Ավելին իմանալու համար` www.orangearmenia.am/book-prize