ՍԴՀԿ-ն իբրև հիմնական պայքարի թիրախ հայտարարում է օլիգարխիան

ՍԴՀԿ-ն հանդես է եկել հայտարարությամբ, որը ներկայացնում ենք ստորև.

Գոհունակությամբ հայտնում ենք, որ Սոցիալ Դեմոկրատ Հնչակյան կուսակցության շուրջ բավական երկար ժամանակ ձգձգվող վեճը վերջապես գտավ իր տրամաբանական ու արդարացի հանգուցալուծումը:

Այլևս պետական բոոր օղակներում իբրև Սոցիալ Դեմոկրատ Հնչակյան կուսակցություն նշվում է ատենապետ Գևորգ Պերկուպերկյանի անունը, կուսակցության անվան հետ խաղացող, նրան այլ քաղաքական ուժին իբրև գործիք ծառայեցնել փորձող բոլոր անձինք մեկընդմիշտ վտարված են:

Ելնելով այս իրականությունից` ՍԴՀԿ Հայաստանի վարչությունը հայտարարում է.

1. Հայցում ենք մեր շարքայինների, համակիրների, Սփյուռքի բոլոր կազմակերպական կառույցների ներողամտությունն այս անցանկալի խնդիրը երկար ձգձգելու և կուսակցության անվան հետ կապված շահարկումների համար:

2. Սոցիալ Դեմոկրատ Հնչակյան կուսակցությունը հայտարարում է նոր ուղու քաղաքականություն: Այսուհետ Հնչակյան կուսակցությունը լինելու այնտեղ, որտեղ ոտնահարվում են մարդու իրավունքները, չեն պաշտպանվում ընկերային ազատությունները, կան հալածյալ և շահագործ հայեր:

3. ՍԴՀԿ-ն սկսում է իր կազմակերպական կառույցների, շրջանների հզորացման գործընթաց՝ հիմնված կուսակցության 125-ամյա գաղափարախոսության, ունեցած փորձի և հավատամքի վրա:

4. Իբրև հիմնական պայքարի թիրախ հայտարարում է օլիգարխիան, որ վերջին 20 տարիներին, ունենալով տնտեսական, կրիմինալ ու քաղաքական լծակներ, դեգրադացրել է Հայաստանի քաղաքական ու տնտեսական դաշտը՝ այն փորձելով դարձնել սեփական հարստացման միջոց և խողովակ:

5. Կրկին ակտիվացվում է ՍԴՀԿ «Սարգիս Տխրունի» ուսանողական-երիտասարդական միությունը՝ իբրև երիտասարդների շահերի պաշտպան, նրանց խնդիրների բարձրացման, հասարակական հնչեղություն տալու հարթակ, որը կգտնվի այնտեղ, որտեղ հայ երիտասարդն է՝ իր խնդիրներով, հոգսերով, ոտնահարված իրավունքներով և լուծման կարոտ հոգսերով:

Սոցիալ Դեմոկրատ Հնչակյան կուսակցության Հայաստանի վարչությունը զանգվածային լրատվամիջոցներին խնդրում և հորդորում է առավել նրբանկատ լինել կուսակցության գործունեությունը լուսաբանելիս՝ ՍԴՀԿ-ից վտարված անձերին իբրև հնչակյան չներկայացնելու կոչով: ՍԴՀԿ-ն Հայաստանում միակն է, գրանցված է Արդարադատության նախարարության պետական ռեգիստրում՝ ատենապետ ունենալով Գևորգ Պերկուպերկյանին և իբրև ղեկավար մարմին՝ ՍԴՀԿ Հայաստանի վարչությունը հետևյալ կազմով.

1. Արթուր Հայրապետյան
2. Վոլոդյա Ազատյան
3. Վարազդատ Եղիազարյան
4. Խաչիկ Սարգսյան
5. Հովհաննես Տերտերյան
6. Արտյոմ Խոյեցյան
7. Գևորգ Պերկուպերկյան