«ՕեԿ-ի` Վարդան Ղուկասյանին սատարելն անհեթեթություն եմ համարում»,- Aravot.am-ի հետ զրույցում այսպիսի կարծիք հայտնեց Գյումրիի «Ասպարեզ» ակումբի նախագահ Լևոն Բարսեղյանը:
«Նա բացատրեց՝ «Ոչ թե արժանի չի սատարման, այդ իմաստով չեմ ասում, այլ այն իմաստով, որ թեկնածուների հնարավոր խումբը հայտնի չէ, դեռ չեն առաջադրվել, ՕեԿ֊ն արդեն հայտարարում է կոնկրետ մեկին սատարելու մասին: Կապ չունի՝ Վարդան Ղուկասյա՞նն է նա, թե՞ մեկ այլ մարդ: Սա նշանակում է, որ ինքը «ֆալշ ստարտ»՝ կեղծ ստարտ է անում: Իսկ դա նշանակում է, որ իրեն հրահրել են նրան սատարել:
Ուրիշ կուսակցություն կսպասեր, թեկնածուների ողջ սպեկտորը կտեսներ, կասեր՝ ախպեր, ճիշտ է, մենք այսինչ մարդուն շատ էինէ հավանում, բայց դու մի ասա՝ այսպիսի թեկնածուներ էլ կան: Ի վերջո՝ կարելի է իրենց հասկանալ, մյուս հնարավոր թեկնածուն՝ Սամվել Բալասանյանը, թողել է իրենց կուսակցությունը ժամանակին, փոխել է ճակատագիրը, և դրանով վրեժ է լուծում»:
Լևոն Բարսեղյանը կանխատեսում էր արել, որ Վարդան Ղուկասյանն այնքան տխուր է, վատ տրամադրություն ունի և չի առաջադրվի: Մենք նրանից հետաքրքրվեցինք, թե որտեղի՞ց են այդ տեղեկությունները, որ նա չի պատրաստվում առաջադրվել: Լևոն Բարսեղյանը պարզաբանեց. «Չկան լուրեր, որ նա առաջադրվելու է, և չկան լուրեր, որ չի առաջադրվել: Բայց ՀՀԿ մարզխորհրդի նիստում իր պահվածքից, իր պաշտոնից հրաժարման պահին իր տեսքը, իր խոսքերը, եկեղեցուն նորից անդրադառնալը… հուսահատության էլեմենտներ եմ տեսել ես: Բայց դա իմ սուբյեկտիվ կարծիքն է»:
