ԲՀԿ խմբակցության քարտուղար Նաիրա Զոհրաբյանը կարծում է, որ ՀԱԿ-ի ձևավորումը հասարակական պահանջ էր, քանի որ հասարակության մի լայն հատված հենց ՀԱԿ-ին էր դիտարկում իբրև իր շահերը իրականացնող: «Իհարկե, միշտ չէ, որ անձնապես համաձայն եմ եղել և այսօր էլ համաձայն եմ բոլոր այն քայլերի հետ, որոնք անում է Կոնգրեսը, ինչը բնական է: Սակայն պիտի ընդունել, որ այսօր ՀԱԿ-ը ներքաղաքական դաշտի կարևորագույն խաղացողներից է, ինչը չես ասի իրենց ընդդիմություն համարող որոշ այլ ուժերի մասին»,- Aravot.am-ի հետ զրույցում ասել է Նաիրա Զոհրաբյանը:
Ըստ պատգամավորի. «Չէի ասի, որ առաջ ՀԱԿ-ն իրենից ավելի հզոր ուժ էր ներկայացնում, քան հիմա: Իմ գնահատմամբ, հակառակը՝ ՀԱԿ-ը հրաժարվելով ծայրահեղական գնահատականներ հնչեցնելուց, ծայրահեղական քայլեր որդեգրելու քաղաքականությունից, ճշգրիտ քաղաքական դաշտ է տեղափոխվել: Եվ ես բնավ այն կարծիքին չեմ, որ դրանով ՀԱԿ-ը թուլացել է»:
Aravot.am-ի դիտարկմանը, որ նախկինում ԲՀԿ-ի ներկայացուցիչները, այդ թվում նաև Զոհրաբյանը, առավել խիստ էին դատում Կոնգրեսին, զրուցակիցը հակադարձել է. «Այո, ես ՀԱԿ-ի այսօրվա քաղաքականությունը շատ ավելի ճշգրիտ եմ համարում, քան նախկին՝ ամեն ինչ կազմաքանդելու, ավերելու ծայրահեղ քաղաքականությունը: Ինչը չէր լուծում մի կարևորագույն հարց. Թեև իրարամերժ կարծիքներ ունենալու դեպքում միմյանց լսելու և հարգելու մշակույթի ձևավորում»:
Զոհրաբյանը գտնում է, որ ծայրահեղականությունն, ընդհանրապես, մեր հասարակության համար երբեք չէր կարող ստեղծել փոխադարձ վստահության և հանդուրժողականության մթնոլորտ: Ու այս համատեքստում նկատելի ու դրական է համարում գոնե խորհրդարանում այդ նոր քաղաքական մշակույթի ձևավորման նախադրյալները, երբ շատ դեպքերում նաև տրամագծորեն հակառակ դիրքորոշում ունեցող քաղաքական ուժերն այս կամ այն հարցի շուրջ կարող են համագործակցել, երբ կա ընդհանուր շահ: «Համենայնդեպս, չհամագործակցելու դեպքում էլ ոչ մեկը մյուսին թշմամի չի որակում: Սրան պետք է ձգտենք»,- կարծում է ԲՀԿ խմբակցության քարտուղարը:
