Եգիպտոսի դատախազությունը պաշտոնապես բողոքարկել է երկրի նախկին նախագահ Հոսնի Մուբարաքի դատավճիռը: Այս մասին, ինչպես հաղորդում է RIA Novosti-ն, լրագրողներին հայտնել է դատախազության ներկայացուցիչ, արդարադատության խորհրդական Մուստաֆա Սուլեյմանը:
Հունիսի 2-ին Կահիրեի քրեական դատարանը որոշում կայացրեց «դարի գործով»՝ Հոսնի Մուբարաքին դատապարտելով ցմահ ազատազրկման:
«Բողոքարկման համար բոլոր անհրաժեշտ փաստաթղթերը ներկայացվել են երկրի վճռաբեկ դատարան՝ պահանջելով վերանայել նախկին նախագահ Մուբարաքի գործը»,- ասել է Սուլեյմանը:
Նրա խոսքերով՝ ներկայացված փաստաթղթերը «պատրաստվել են ամենամեծ ջանասիրությամբ, դրանցում հաշվի են առնվել բողոք ներկայացնելու բոլոր օրինական պահանջները»: Դատախազության պատրաստած գործի ծավալը ավելի քան 1000 էջ է:
Այսօր Վճռաբեկ դատարան «դարի գործը» բողոքարկելու հայց է նրկայացրել նաև նախկին նախագահի փաստաբանը՝ Ֆարիիդ Ալ-Դիբը: Նրա խոսքերով՝ իր կողմից պատրաստված փաստաթղթերը ներառում են 11 հիմնավորում, ըստ որոնց՝ նախկին նախագահի դատավճիռը պետք է վերանայվի:
