Հայտնի ամերիկացի ռեփեր և դերասան Snoop Dog-ը հայտարարել է, որ հոգնել է հիփ-հոփից և մտադիր է ստեղծագործել ռեգգի երաժշտական ոճում և նույնիսկ փոխել է իր անունը՝ Snoop Lion: Այս մասին հաղորդում է Associated Press-ը:
Երաժշտի խոսքով՝ փետրվարին Ճամայկա կատարած այցի ժամանակ ինքը վերածնվել է, «կապ հաստատել» ռեգգի ոճի ամենահայտնի կատարող Բոբ Մառլիի հետ և ներկայում հանդիսանում է նրա «վերամարմնավորումը»:
Snoop Dog-ը Նյու Յորքում հարցազրույցի ժամանակ չի բացատրել, թե ինչու է Ճամայկայում իրեն վերագրել Snoop Lion անվանումը, սակայն, ամենայն հավանականությամբ, դա կապված է Հուդայի առյուծի հետ, որը հանդիսանում է ռաստաֆարիանականության և եթովպիական մշակույթի խորհրդանիշներից մեկը:
Ռեփերը հայտարարել է, որ դադարում է երգել բռնության մասին, այսուհետ նրա երաժշտոթյունը հագեցած կլինի ռեգգիի խաղաղ նոտաներով: Այս մասին հաղորդում է Radaronline պորտալը:
Այս տարվա աշնանը կթողարկվի երգչի նոր ալբոմը, որին կհաջորդի փաստագրական ֆիլմի ու գրքի լույս ընծայումը:
Snoop Dog-ը ԱՄՆ-ում ճանաչում է ձեռք բերել 1993-ին թողարկված Doggystyle ալբոմով: Նա նկարահանվել է ավելի քան 2 տասնյակ ֆիլմերում:
