Նախագահի ընտրությանը մոտ, ամենայն հավանականությամբ, կրկին ակտիվանալու են խոսակցությունները Ռոբերտ Քոչարյանի քաղաքական գործոնի վերաբերյալ: Գրեթե կասկած չկա, որ Քոչարյանն ինքը կխթանի այդ խոսակցություններըʽ հանդես գալով որևէ հայտարարությամբ, որևէ հարցազրույցով, կամ մասնակցելով խորհրդանշական որևէ միջոցառման և այդպիսով տալով մեկնաբանությունների և վերլուծությունների առիթ: Արդեն իսկ տեղեկություններ կան, որ Ռոբերտ Քոչարյանն ակտիվորեն ներգրավված է լինելու ՏԻՄ ընտրություններում ԲՀԿ թեկնածուների քարոզարշավին:
Այն, որ Ռոբերտ Քոչարյանը կրկին լինելու է ներքաղաքական գործընթացի առանցքային դեմքերից մեկը՝ անգամ անկախ իր մասնակցության ուղղակի, թե անուղղակի ձևաչափից, երևի թե որևէ մեկի մոտ կասկած չի հարուցում: Սակայն, ներկայումս բավական էական հարց է, թե Ռոբերտ Քոչարյանն ինչ խողովակ կարող է ընտրել իր քաղաքական մասնակցության համար: Բանն այն է, ինչպես ցույց տվեց խորհրդարանի ընտրությունը, որ միայն ԲՀԿ-ն բավարար խողովակ չէ, որովհետև այդ կուսակցության մեջ կա շահերի բազմազանություն, և Քոչարյանի համար կարծես թե դժվար է ԲՀԿ-ում հաղթել Սերժ Սարգսյանին այն հաշվով, որը թույլ կտա նրան դուրս թողնել հետագա պայքարից: ԲՀԿ-ում Ռոբերտ Քոչարյանը առայժմ կարողանում է անհրաժեշտ խաղի հաշիվ պահել միայն Հայ ազգային կոնգրեսի հաշվարկով: Քոչարյանը Կոնգրեսին խաղից դուրս չի թողնում, բայց պահում է իրեն ձեռնտու հաշիվըʽ այդ տեսանկյունից պարզապես ժամանակ շահելով: Որքան երկար Կոնգրեսը մնա ԲՀԿ հետ խաղի մեջ, այդքան ավելի լավ Ռոբերտ Քոչարյանի համար. գոնե այդ մասով նա իր ծրագրերը ԲՀԿ-ում հաջողությամբ սպասարկած կլինի: Իսկ ահա Սերժ Սարգսյանի մասով իրավիճակը բարդ է: Բանն այն է, որ զուտ հեղինակության առումով Բարգավաճ Հայաստանում Ռոբերտ Քոչարյանը անկասկած բավական առաջ է բոլորից, հատկապես կուսակցության նախագահ Գագիկ Ծառուկյանի մոտ, բայց բանը միայն հեղինակությամբ չէ, այլ նաև ռեալ իշխանությամբ: Երկրորդ նախագահը դա չունի, ինչն էլ բարդացնում է իրավիճակը:
Որքան էլ Գագիկ Ծառուկյանի համար Քոչարյանը հեղինակություն է, և նա մեծագույն պատրաստակամությամբ կուսակցության նախագահի պաշտոնն անգամ կարող է զիջել Քոչարյանին, միևնույն է, Ծառուկյանը խոշոր գործարար է, օլիգարխ, որի շատ ու շատ հարցերի բանալիներ իշխանության ձեռքերում են, պետական քաղաքականության ձեռքերում: Իսկ դա նշանակում է, որ Ծառուկյանը առնվազն ստիպված է հաշվի նստել Սերժ Սարգսյանի հետʽ անգամ Ռոբերտ Քոչարյանի քաղաքական շահերի հաշվին: Օրինակʽ դրա վկայություններից մեկը Գյումրիի քաղաքապետի ընտրության շուրջ ստեղծված իրավիճակն է, երբ Գագիկ Ծառուկյանը փաստորեն ստիպված էր ընդունել Սերժ Սարգսյանի թեկնածությունը՝ ի դեմս Սամվել Բալասանյանի, այն դեպքում, երբ Ռոբերտ Քոչարյանը, օրինակ, թերևս շատ ավելի գոհ կլիներ, եթե ԲՀԿ-ն առաջադրեր Մարտուն Գրիգորյանին, ով նախկինում Դաշինք կուսակցության նախագահ Սամվել Բաբայանի հովանավորյալն էր: Իսկ Բաբայանն էլ, ինչպես հայտնի է, հայաստանյան քաղաքական դաշտում Ռոբերտ Քոչարյանի հովանավորյալն էր: Այդ ամենը մի օրինակ է իհարկե, և դրա վրա ընդհանրական եզրակացություններ անել ամբողջ նախագահական արշավի վերաբերյալ, թերևս կլինի փոքր-ինչ շտապողական և սխալ, քանի որ նախագահի ընտրությանը, անշուշտ, դերակատարում են ունենալու նաև բազմաթիվ այլ ծանրակշիռ ներքին ու առավել ևս արտաքին գործոններ: Սակայն, այդուհանդերձ, փաստը խոսուն է և թերևս վկայում է, որ Բարգավաճ Հայաստանը շարունակելու է երկփեղկվել Սերժ Սարգսյանի ու Ռոբերտ Քոչարյանի միջև, ու դժվար է ասել, թե Գագիկ Ծառուկյանը դեռ ինչքան երկար կարող է ձգել ռեզինը: Ի դեպ, կարծես թե հենց այդ առումով էլ նրան օգնություն է տրամադրում Կոնգրեսը, որը Բարգավաճ Հայաստանի հետ սիրախաղի շնորհիվ Ծառուկյանին հնարավորություն է տալիս բարեհաջող մտնել Սերժ Սարգսյանի և Ռոբերտ Քոչարյանի միջև:
Այստեղ հարցը նաև այն է, թե Կոնգրեսը որքան կկարողանա սնուցել Գագիկ Ծառուկյանին այդ, ըստ էության, լարախաղացության գործում: Իսկ Կոնգրեսի ռեսուրսն այստեղ հավերժական չէ, քանի որ նախ որպես քաղաքական ուժ այն կարող է վերջնականապես վարկաբեկվել և անգամ անվանական առումով դուրս մնալ քաղաքական հրատապ գործընթացից, եթե շարունակի երկարեցնել անպտուղ սիրավեպը ԲՀԿ-ի հետʽ ցույց չտալով ոչ մի էական արդյունք, և, բացի այդ էլ, առկա իրավիճակը կարող է էլ ավելի մեծացնել Կոնգրեսի ներքին դժգոհությունը վարվող կուրսի նկատմամաբ և բերել լրջագույն տրանսֆորմացիաներիʽ այդպիսով Կոնգրեսը կտրելով ԲՀԿ-ից: Հետևաբար, Կոնգրեսը հազիվ թե երկար ժամանակ կարողանա կատարել Գագիկ Ծառուկյանի «ձեռքի ձողի» դերը ներքաղաքական լարի վրա:
ԲՀԿ առաջնորդը շատ մոտ ապագայում ստիպված է լինելու զրկվել այդ ձողից ու ընտրություն կատարել: Նա կուսակցությունը կաʼմ կհանձնի Ռոբերտ Քոչարյանին և այդպիսով դուրս կգա նրա ու Սերժ Սարգսյանի արանքից, կաʼմ պարզապես կընկնի նրանց միջև իր իսկ քաշած լարի վրայիցʽ «սուրբ լարը» թողնելով թափուր: Ընդ որում, այդ թափուր տեղին կարող է հավակնել Հայ ազգային կոնգրեսը, քանի որ Կոնգրեսի ներկայիս քաղաքական կուրսը այլ հավակնության հիմք չի տալիս, քան զբաղեցնել Ծառուկյանի տեղը Սերժ Սարգսյանի ու Ռոբերտ Քոչարյանի միջև:
