Երեքշաբթի Վենեսուելան ներառվել է «ՄԵՐԿՈՍՈՒՐ»-ում` պաշտոնապես դառնալով հարավամերիկյան ընդհանուր շուկայի անդամ: Անդամագրման արարողությունը տեղի է ունեցել Բրազիլիայի մայրաքաղաքում, որին մասնակցել է նաև Վենեսուելայի նախագահ Ուգո Չավեսը: Նրա խոսքով` ընդլայնումից կազմակերպությունը միայն կշահի: Չավեսի խոսքով` կազմակերպությանն անդամակցելը նոր հնարավորություններ կբացի վենեսուելացի արտադրողների առջև:
Ավելի վաղ Չավեսը հայտարարել էր, որ «ՄԵՐԿՈՍՈՒՐ»-ին անդամակցելը 240 հազար նոր աշխատատեղ կբացի: Կստեղծվի նաև հատուկ հիմնադրամ, որից միայն 2012-ին 500 միլիոն դոլարի չափով աջակցություն կտրամադրվի տեղացի արտադրողներին ` հարավամերիկյան ընդհանուր շուկայի շրջանակում նախագծեր իրականացնելու համար: Այս մասին հաղորդում է RIA Novosti-ն:
Հարավամերիկյան ընդհանուր շուկան ձևավորվել է 1991 թվականին` Ուրուգվայի, Արգենտինայի, Բրազիլիայի և Պարագվայի կողմից: Երկրների առաջնորդների միջև կնքվել է մաքսային միության և ընդհանուր շուկայի մասին համաձայնագիր: Կազմակերպության անդամներն են նաև Չիլին, Բոլիվիան, Պերուն, Կոլումբիան և Էկվադորը:
