Սեպտեմբերին Վրաստանում կայանալիք խորհրդարանական ընտրությունների նախաշեմին թբիլիսահայ համայնքի մոտավորապես կեսը կողմնորոշված է դեպի ընդդիմություն, իսկ մյուս կեսը սատարում է իշխանությանը: «Առաջին լրատվական»-ի հետ զրույցում այս մասին ասաց «Վրաստանի հայերի իրավունքների պաշտպանության ասոցիացիայի» նախագահ Կարինա Բարսեղյանը:
Նրա խոսքովʽ վիրահայ ընտրողների ձայները բավական կարևորվում և ընտրությունների ժամանակ խիստ որոշիչ դեր են ունենում: «Ամբողջ Վրաստանում մոտ 260 հազար հայ է ապրում»,- շեշտեց նա՝ միաժամանակ հավելելով, որ այդ երկրում տեղի ունեցող ընտրություններից առաջ վիրահայ համայնքը բարձրաձայնում և լուծում է պահանջում իրեն հուզող մի շարք հիմնախնդիրների համար: «Տեղի հայերի համար ամենացավոտը Ջավախքում հայոց լեզվի պահպանության, պատմական հուշարձանների վերադարձի և Ցեղասպանության ճանաչման հարցերն են»,- նշեց Կարինա Բարսեղյանը:
