AP-ի հաղորդմամբ` ՄԱԿ-ի կոնֆերանսում չհաջողվեց համաձայնեցնել զենքի միջազգային առքուվաճառքի մասին պայմանագրի տեքստը, որով վերահսկողություն էր սահմանվելու զենքի տարբեր տեսակների արտահանման և ներկրման վրա:
Որոշ դիվանագետներ բանակցությունների խափանման մեղավոր են համարել ԱՄՆ-ին, որի ներկայացուցիչները հայտարարել էին, թե իրենց ավելի երկար ժամանակ է անհրաժեշտ տեքստին ծանոթանալու համար: Կոնֆերանսից հետո ԱՄՆ ներկայացուցիչը չպատասխանեց նաև լրագրողների հարցերին:
ԱՄՆ հայտարարությանը` տեքստին ծանոթանալու համար ժամանակ տրամադրելու մասին, միացան նաև Ռուսաստանը և Չինաստանը: Արդյունքում տեքստը ստորագրեց 90 երկիր, այդ թվում` Եվրամիության բոլոր անդամ-երկրները, Լատինական Ամերիկայի բոլոր երկրները, Աֆրիկան և Կարիբյան ավազանի երկրները: Մինչդեռ որպեսզի պայմանագիրը իրավական ուժ ստանա, անհրաժեշտ է բոլոր` 193անդամ-երկրների ստորագրությունը: Նման փաստաթղթի անհրաժեշտության մասին հայտարարվել էր դեռևս 2006 թ. ՄԱԿ-ի Գլխավոր ասամբլեայի ժամանակ: Սակայն այս տեքստի քննարկումը սկսվել էր միայն այս տարվա հուլիսի 3-ից:
Այսօր զենքի միջազգային առքուվաճառքի շրջանառությունը գնահատվում է 60 միլիարդ դոլար, իսկ միջազգային պայմանագրի առկայությունը թույլ չի տա, որ զենք հայտնվի ահաբեկիչների կամ այլ զինված խմբավորումների ձեռքը:
