Գլենդելի քաղաքապետարանը կրճատում է 110 աշխատատեղ: Դա մեծ հարված կհասցնի հանրային ծառայություններին: Իշխանությունները նախազգուշացնում են, որ նախկինից փոքր աշխատուժով հանրային ծառայությունների իրականացումը (ծառերի էտում, թփերի գեղարվեստական մշակում, ասֆալտի մասնակի վնասվածքի վերականգնում, էլ.փոստի նամակների պատասխանում) համեմատաբար երկար ժամանակ կպահանջի: Այս մասին հաղորդում է Glendale News Press-ը:
Աշխատակազմի «վերակառուցման» արդյունքում քաղաքը ավելի քան 20 միլիոն դոլար կտնտեսի՝ տարեկան 54 հազար դոլար: Աշխատակազմի «վերակառուցումը», որը ներառում է թոշակի անցում և հեռացում, ընդգրկում է 140 աշխատատեղ, սակայն դրանցից 30-ը կհամալրվեն: Արդյունքում, աշխատակազմը կկրճատվի 110-ով: 117 աշխատակիցներ վաղաժամ թոշակի կանցնեն մինչ օգոստոսի 31-ը:
«Մենք գործարան չենք, որ ավտոմատացվենք: Ծախսերի մեծ մասը աշխատուժն է տանում»,-ասել է քաղխորհրդի անդամ Լորա Ֆրիդմանը:
Փոփոխությունների շրջանակում նախատեսվում է մի շարք աշխատակիցների հավելյալ գումարի դիմաց կցել նոր պարտականություններ:
Կրճատումների ալիքը հարվածել է նաև հայերին: Թոշակի կանցնեն Երթևեկության և տրանսպորտի ադմինիստրատոր հայազգի Ջանո Բաղդանյանը և նրա ավագ օգնական Թոմ Միտչելը:
Կրճատվածների թվում այլ անուններ չեն հիշատակվում: Չի բացառվում, որ նրանց թվում հայազգի այլ ներկայացուցիչներ ևս կարող են լինել:
Ինչպես ավելի վաղ տեղեկացրել էինք, վերջին 10 տարիներին կառույցում բազմազանությունն աճել է: 2002 թվականից հայերի թիվը 83%-ի աճ է գրանցել: Գլենդելի քաղաքապետարանում 362 հայ կա: Նրանք 8%-ով են ներկայացված բարձրագույն պաշտոններ զբաղեցնող անձանց շարքում:
