ՀԱԿ ներկայացուցիչ Դավիթ Շահնազարյանը այսօր հրավիրված մամլո ասուլիսում կարևորել էր «Ազգային համաձայնության» ձևավորումը: «Առաջին լրատվական»-ի հարցին, թե ինչպե՞ս դա կարող է տեղի ունենալ, երբ ՀԱԿ-ին քննադատում են ընդդիմադիր կուսակցությունները, օրինակ` Տիգրան Կարապետյանի ԺԿ-ն, «Ժառանգությունը», Դ.Շահնազարյանը պատասխանեց.
«ՀԱԿ-ն այսօր ունի իր ընդդիմությունը: Հայտնվել են ինչ-որ ուժեր, որոնք փորձում են քաղաքական դաշտում իրենց տեղը գտնել` որպես ՀԱԿ-ին ընդդիմություն: Ինչ վերաբերվում է «Ազգային համաձայնությանը», ապա դրա հաստատման մեկ ձև կա` ազատ ընտրություններն են:
ՀԱԿ-ը իր խնդիրը համարում է իշխանափոխությունը և արտահերթ ընտրությունները: Ստեղծված իրավիճակում հերթական ընտրություններով որևէ հարց չի լուծվելու, և «Ազգային համաձայնությունը» կկայանա միայն և միայն արտահերթ ընտրությունների միջոցով, այլապես քաղաքական ճգնաժամը չի հաղթահարվի:
Մենք պայքարել և պայքարելու ենք բացառապես այս ռեժիմի դեմ` ստեղծելու ժողովրդի իշխանություն: Ով կաջակցի մեզ այդ պայքարում` մենք միայն ու միայն կողջունենք դա: Եվ հավելեմ, որ իշխանությունները սպառել են բոլոր հնարավորությունները` ստեղծելու նոր կեղծ ընդդիմություն»:
Իսկ հարցին, թե որքա՞ն են խորացել Ս.Սարգսյանի և Ռ.Քոչարյանի միջև հակասությունները, և ի՞նչ հանգուցալուծում կունենան կուսակցական մակարդակում արտահայտված հակասությունները`Դ.Շահնազարյանը պատասխանեց.
«Ամենատրամաբանական հանգուցալուծումը կլինի այն, որ ԲՀԿ-ն տարանջատվի այդ անձնավորությունից, որը Հայաստանի ժողովրդի հետ որևէ կապ չունի, և միայն վատություն է արել մեր ժողովրդին»:
