Թուրքական Zaman թերթի փոխանցմամբ՝ ԽՍՀՄ փլուզումից և տևական ընդմիջումից հետո Ուզբեկստանը դիմել է Թուրքիային՝ ձգտելով բարելավել Անկարայի հետ իր հարաբերությունները, որոնք վերջին տարիներին լարված էին:
Ուզբեկստանի նախագահ Իսլամ Կարիմովը Թուրքիայում Ուզբեկստանի դեսպան Ուլֆատ Կադիրովի միջոցով նամակ է հղել Թուրքիայի վարչապետ Ռեջեփ Էրդողանին: Կադիրովն Էրդողանի հետ հանդիպել է Անկարայում օտար դիվանագետների հետ հանդիպման շրջանակներում:
Իր ելույթում Կադիրովը հայտարարել է, որ Ուզբեկստանը Թուրքիան համարում է բարեկամական ու եղբայրական երկիր ուզբեկների համար: Դեսպանն ընդգծել է, որ Թուրքիան զգալի առաջընթաց է ունեցել վերջին տարիներին:
Հիշեցնենք, որ վերջերս Ուզբեկստանը դուրս է եկել ՀԱՊԿ-ի կազմից: Ինչ վերաբերում է վերջին տարիներին թուրք-ուզբեկական հարաբերությունների խնդրին, ապա Ուզբեկստանն իրականացրել է թուրքական ազդեցության զսպման կոշտ քաղաքականություն՝ մասնավորապես պայքարելով Թուրքիայի տնտեսական և մշակութային ազդեցության դեմ:
Ի դեպ, մի քանի տարի առաջ, երբ Իսլամ Կարիմովը Տաշքենդի օդանավակայանում դիմավորում էր Ռեջեփ Էրդողանին, կատակով ասել էր. «Նեղաչյաները հեռացան ձիերով, կապուտաչյաները վերադարձան ինքնաթիռով»: Սա Թուրքիայում բուռն քննարկումների տեղիք էր տվել:
