ՀՀ կրթության զարգացման 2011-2015 թթ. ծրագրի 40 կետում նշված է, որ մանկավարժական մասնագիտություններով բուհերի ծրագրերն ու ուսումնական պլանները չեն վերանայվել:
ԿԳ նախարար Արմեն Աշոտյանը նշեց, որ մանկավարժական կրթությունը Հայաստանում չի կարող հետ մնալ եվրոպական զարգացումներից. մենք ունենք բովանդակային խնդիրներ, մանկավարժական կրթության ծրագրերը դժվար համադրելի են հանրակրթական ծրագրերի մեթոդաբանության և կրթության նոր առաքելությունների հետ:
Աշոտյանը տեղեկացրեց, որ Համաշխարհային բանկի երկրորդ վարկային ծրագրով Հայաստանի պետական մանկավարժական համալսարանը մրցութային կարգով իրեն գործակից համալսարան է ընտրել Ֆինլանդիայի մանկավարժական համալսարանին, որը համարվում է աշխարհի լավագույն մանկավարժական համալսարաններից մեկը: Այս երկու համալսարանների համագործակցության արդյունքում պետք է վերափոխվեն մանկավարժական կրթության ծրագրերը, մանկավարժական կադրերի պատրաստման տրամաբանությունը: Այս փորձը հետագայում կտարածվի Մանկավարժական համալասարանի մյուս ճյուղերի վրա:
Արմեն Աշոտյանը, զգուշացնելով, որ խոսելու է բաց, ու թող ոչ ոք չնեղանա, ասաց. «Մանկավարժական համալսարան այսօր ընդունվում են մարդիկ, որոնք հիմնականում հայտը լրացնելուց ձեռքի հետ են գրում մանկավարժականի անունը` ինչ-որ մի տեղ ընդունվելու համար: Մանկավարժական համալսարան եկող դիմորդը մոտիվացված չէ: Հետևաբար մենք ունենում ենք ոչ մոտիվացված մանկավարժ: Այս գործընթացը բերում է նրան, որ դասարան են մտնում այն մանկավարժները, որոնց մասնագիտական գիտելիքները չեն բավարարում այդ ոլորտում մասնագետ կոչվելուն»:
Աշոտյանը նշեց, որ անհրաժեշտ է կրթական աստիճաններից մեկում մասնագիտացման հնարավորություն ստեղծել. բալակավրիական կրթությամբ պատրաստել մասնագետներ, իսկ մագիստրոսական մակարդակում արդեն մասնագետներից պատրաստել մանկավարժներ: Աշոտյանն ասաց, որ այդ գործընթացը պետք է սկսել այսօր, որպեսզի մի քանի տարի հետո շոշափելի արդյունք տեսնենք:
Աշոտյանը նաև տեղեկացրեց, որ այսօր Հայաստանում կա 43 հազար ուսուցիչ, որոնք աշխատում են 28 հազար դրույքների վրա, սա նշանակում է, որ մեզ մոտ մանկավարժների գերարտադրություն կա` ամեն տարի շուրջ 3 հազար նորաթուխ մանկավարժ է մտնում աշխատաշուկա պետական և ոչ պետական բուհերից:
Անդրադառնալով միջին մասնագիտական կրթական հաստատությունների գործունեությանը՝ Աշոտյանն ասաց. «Եթե բարձրագույն կրթությամբ մանկավարժներն այսօր պահանջարկ չունեն աշխատաշուկայում, հետևաբար ակնհայտ է, որ միջին մասնագիտական կրթությամբ ուսուցիչը շատ ավելի քիչ պահանջված է: Չգիտեմ, դա ով կանի, բայց հեռանկարում միջին և նախնական մասնագիտական ուսումնական հաստատությունները, որոնք թողարկում են մանկավարժներ, Հայաստանում այլևս պահանջարկ չեն ունենա նաև դե յուրե»: