Տնտեսական համագործակցության կազմակերպության անդամ երկրները ծրագրում են մինչև 2015 թվականը առևտրի ծավալն ավելացնել 20 տոկոսով: Այդ մասին այսօր ՏՀԿ-ի՝ Ստամբուլում ընթացող գագաթնաժողովում հայտնել Է Թուրքիայի նախագահ Աբդուլա Գյուլը, հայտնում է CA-NEWS-ը:
Գագաթնաժողովին մասնակցում են 16 պետությունների ու կառավարությունների, այդ թվում՝ տարածաշրջանային կազմակերպության մասնակից տասը երկրների 16 ղեկավարներ, առաջատար միջազգային կազմակերպությունների ներկայացուցիչներ: Գագաթնաժողովում քննարկվում են մինչև 2015 թվականն ընկած ժամանակաշրջանում համագործակցության գերակա ուղղությունները և ՏՀԿ-ի նոր նպատակները: Դրանց թվում է ՏՀԿ-ի երկրների միջև ազատ առևտրի գոտու ստեղծումը: Բացելով գագաթնաժողովը, Իրանի նախագահ Մահմուդ Ահմադինեժադը հայտարարել է, որ ՏՀԿ-ի նախագահությունը Իրանի Իսլամական Հանրապետությունից անցնում է Թուրքիային: Թուրքիայի նախագահն իր հերթին նշել է, որ իր երկիրը առաջնային նշանակություն է տալիս տարածաշրջանի խաղաղության ու կայունության ապահովմանը և ՏՀԿ-ում իր նախագահության շրջանում ըստ ամենայնի աջակցելու է դրան ուղղված նախագծերին: «Համոզված եմ, որ բոլոր հիմնախնդիրները, որքան էլ դրանք բարդ լինեն, կարելի է լուծել երկխոսության ճանապարհով»,-ասել է Գյուլը:
Թուրքիայի նախագահը ՏՀԿ-ի երկրների համագործակցության առաջնային ուղղություններ է համարում էներգետիկան, կապը, առևտուրը, արդյունաբերությունը, տրանսպորտը, շրջակա միջավայրի պաշտպանությունը, աղքատության և հանցավորության դեմ պայքարը:
Գյուլի ելույթից հետո գագաթնաժողովն աշխատանքը շարունակել է մամուլի համար փակ դռների հետևում:
ՏՀԿ-ի նախորդ գագաթնաժողովը տեղի է ունեցել 2009-ի մարտին Թեհրանում: Տնտեսական համագործակցության կազմակերպությունը 1985թ. հիմնադրվել է Իրանի, Պակիստանի և Թուրքիայի կողմից: Այժմ կազմակերպությանն անդամակցում են նաև Ադրբեջանը, Աֆղանստանը, Տաջիկստանը, Թուրքմենստանը, Ղազախստանը, Ղրղզստանը և Ուզբեկստանը: