Ներքաղաքական զարգացումներին և առաջիկա ընտրությունների ընթացքում քաղաքական վերադասավորումներին անդրադառնալով` ԱԺ պատգամավոր Վարդան Խաչատրյանը կարծիք հայտնեց, որ նախքան ընտրությունները` բոլոր տեսակի խոսակցությունները էական չեն. «Երկրում բավական լարված իրավիճակ է` թե՛ քաղաքական և թե՛ տնտեսական առումով, ինչի համար պատասխանատու է իշխանությունը: Հետագա զարգացումները կախված կլինեն այն հանգամանքից, թե ինչքանով իշխանությունները կկարողանան վերացնել այդ լարվածությունը»:
ՀՀԿ-ԲՀԿ լարված հարաբերությունները Վարդան Խաչատրյանը բնութագրեց այն հանգամանքով, որ սրանք տարբեր քաղաքական ուժեր են:
ԱԺ ՀՀԿ-ական պատգամավոր Գագիկ Մելիքյանն էլ նկատեց, որ կոալիցիոն կուսակցությունների շրջանում որևէ տարաձայնություն չկա, կա պարզապես ներքաղաքական մրցակցություն` պայմանավորված գալիք ընտրություններով: Մելիքյանը հայտարարեց, որ ՀՀԿ-ն իր առջև խնդիր է դրել հաղթելու և ԱԺ-ում բացարձակ մեծամասնություն ունենալու:
Հանրապետական պատգամավորի գնահատմամբ, ընդդիմադիր դաշտից ՀԱԿ-ը ֆիասկո է ապրում. «ՀԱԿ-ն իր առջև նպատակ էր դրել իշխանությությունների արտաքին քաղաքականության տապալման դեպքում երկրում անկայունության ձևավորմամբ փոփոխությունների հասնել, սակայն դա նրանց չհաջողվեց, և այժմ ՀԱԿ-ը փնտրտուքի մեջ է»:
Վարդան Խաչատրյանն էլ կարծիք հայտնեց, որ ընդդիմադիր թևում զարգացումներն ընթանում են, և հնարավոր է` դրանք որոշակի միավորումների հանգեցնեն:
