Երուսաղեմի ԶԼՄ–ների և հաղորդակցության կենտրոնի (JMCC) անցկացրած հարցումը պաղեստինյան արաբների վերաբերմունքի լուրջ տեղաշարժ է բացահայտել արաբա–իսրայելական հակամարտության խաղաղ կարգավորման հարցի նկատմամբ։
Հարցման արդյունքների համաձայն՝ հարցվածների բացարձակ մեծամասնությունը՝ 96,1% մերժել են պաղեստինյան պետություն ստեղծելու տարբերակը, եթե նրա մայրաքաղաքը Երուսաղեմը չդառնա։ «Պաղեստինն առանց Երուսաղեմի» տարբերակի հետ համաձայնելուն պատրաստ է հարցվածների միայն 3%–ը:
Հարցումը ցույց է տվել նաև, որ զգալիորեն նվազել է պաղեստինյան արաբների կողմից «երկու ժողովուրդների համար երկու պետություն» սկզբունքի աջակցությունը՝ որպես բանակցային գործընթացի հիմք։
Հարցումը նաև վկայում է, որ պաղեստինյան հասարակությունը գնալով ավելի քիչ է հավատում Իսրայելի հետ խաղաղ բանակցությունների դրական ելքին և ավելի հակված է անկախության նվաճման ուժային սցենարին։
Հարցվածների 71,4%-ը գտնում է, որ ԱՄՆ–ն չպետք է լինի Իսրայելի հետ խաղաղ բանակցությունների նախընտրելի միջնորդը։ Նրանցից 25,4%-ը հայտարարել են, որ որպես միջնորդ նախընտրում են Եվրամիությանը, 22,4%-ը այդ դերում տեսնում է ՄԱԿ–ին, 10,7%-ը միջազգային քառյակին՝ իր ներկայիս կազմով (ԵՄ, ՄԱԿ, ԱՄՆ և Ռուսաստան)։
Պաղեստինի առաջնորդ Մահմուդ Աբբասի գործունեությունից բավարարվածների թիվը նույնպես ընկել է։ Նրա աշխատանքին դրական գնահատական է տվել հարցվածների 39,1%-ը։ 2016-ի հուլիսին այդ թիվը 44,6% է եղել։
Հարցվածների 30,7%-ը հայտարարել են Պաղեստինում խոսքի ազատության բացակայության մասին, 2016-ի հուլիսին այդ թիվը 23,4% է եղել։ 17,5%-ը գտնում է, որ խոսքի ազատությունը սահմանափակվում է իշխանությունների կողմից։
Հարցումն անցկացվել է 2018 թվականի հունվարի 27-ից փետրվարի 2-ը։ Հարցմանը 1200 մարդ է մասնակցել։
