Ռեժիսոր Սթիվեն Սփիլբերգն ու պրոդյուսեր Ջեֆրի Քաթցենբերգը 500 հազարական դոլար են նվիրաբերել զենքի վերահսկողության երթի համար, որը անց է կացվելու ԱՄՆ-ում, մարտի 24-ին:
Երթը կազմակերպում են Ֆլորիդայի դպրոցի աշակերտները, որտեղ փետրվարի 14-ին նախկին աշակերտ Նիկոլաս Քրուզը, իր օրինական ճանապարհով ձեռբ բերված ինքնաձիգից, սպանել էր 17 մարդու: Երթին, որ տեղի է ունենալու Վաշինգտոնում և ԱՄՆ այլ քաղաքներում, իրենց աջակցությունն են հայտնել նաև Ջորջ Քլունին, հեռուստահաղորդավար Օփրա Ուինֆրին և այլ հայտնիներ: Փետրվարի 21-ին զոհված աշակերտների ծնողները Սպիտակ տանը հանդիպել են նախագահ Թրամփի հետ: Նրանք պահանջել են փոխել զենքի ազատ վաճառքի վերաբերյալ օրենսդրությունը: Փոխարենը Թրամփն առաջարկել է զինել ուսուցիչներին: Նա պնդում է, որ խնդիրը ոչ թե զենքի մեջ է, այլ մարդասպանի հոգեկան շեղումների: Թրամփի հետ հանդիպմանը զոհերի հրեական արմատներով բարեկամները Իսրայելի օրինակն են բերել, որտեղ զենքի տնօրինման խիստ սահմանափակումներ կան, իսկ դպրոցներում, ի տարբերություն ամերիկյանի, միայն մեկ մուտք է, որը լավ հսկվում է: