Նախագահի թեկնածու Արմեն Սարգսյանը Սերժ Սարգսյանին իր որոշման մասին հայտնելուց հետո, որ պատրաստ է առաջադրվել, հանդիպել է վարչապետ Կարեն Կարապետյանին: Հանդիպումը հետաքրքրական է ինքնին, սակայն ուշագրավ է դառնում այն, որ Արմեն Սարգսյանը Կարեն Կարապետյանի հետ հանդիպում է արդեն որոշում կայացնելուց հետո, ոչ թե դրանից առաջ, երբ հանդիպումներ էր ունենում թե՛ Հայաստանի, թե՛ Սփյուռքի տարբեր շրջանակների, խորհրդարանական խմբակցությունների հետ:
Ստացվում է շատ հետաքրքիր պատկեր. օրինակ՝ Արմեն Սարգսյանը վերջնական որոշում կայացնելու համար Արամ Գասպարի Սարգսյանի հետ հանդիպում է, որը հայտնի չէ, թե ինչ դերակատարում ունի ներկայիս գործընթացներում, կամ Հայ ազգային կոնգրեսի հետ հանդիպում է, որը չի կարողացել հաղթահարել խորհրդարանական 5 տոկոսի արգելքը, իսկ ահա պաշտոնապես՝ մոտ 80 տոկոս, իսկ ոչ պաշտոնապես մոտ 20-25 տոկոս վարկանիշ ունեցող և վարչապետի պաշտոնը զբաղեցնող Կարեն Կարապետյանի հետ, վերջնական որոշմանն ընդառաջ, չի հանդիպում:
Հենց այդ հանգամանքը ավելի հետաքրքիր է դարձնում Սերժ Սարգսյանին իր որոշման մասին հայտնելուց հետո Կարեն Կարապետյանի հետ հանդիպելը: Արդյոք Սերժ Սարգսյանի հորդորով կամ հանձնարարությա՞մբ է տեղի ունենում այդ հանդիպումը: Ինչո՞ւ է առաջացել այդպիսի հանդիպման անհրաժեշտություն, ո՞րն է եղել դրա նպատակը կամ իմաստը, եթե Արմեն Սարգսյանի համար առաջիկա զարգացումներում Կարեն Կարապետյանի դերակատարումը կարծես թե բավականին ցածր է, գոնե առերևույթ:
Համենայնդեպս, Սարգսյանը ներկայումս ունի խորհրդարանում առաջին փուլով անցնելու խնդիր, որտեղ կարևորը «Ծառուկյան» խմբակցության դիրքորոշումն է: Բայց, օրինակ, Ծառուկյանի հետ առանձին հանդիպում Սարգսյանը չունեցավ, թեև ինքը՝ Ծառուկյանը, հայտնել էր այդպիսի մտադրության մասին: Կլինի՞ այդպիսի հանդիպում մինչև մարտի 2-ի քվեարկությունը, թե՞ ոչ:
Մյուս կողմից՝ Արմեն Սարգսյանն իր պաշտոնը կստանձնի ապրիլի 9-ից հետո, երբ Կարեն Կարապետյանը ներկայացրած կլինի Սահմանադրության պահանջով թելադրվող հրաժարականը՝ Սերժ Սարգսյանի պաշտոնաթողությունից հետո: Այսինքն՝ Արմեն Սարգսյանը գործելու է փաստորեն նոր վարչապետի ժամանակահատվածում, իսկ այստեղ Կարեն Կարապետյանի շանսերը թերևս նվազում են օրեցօր՝ համենայնդեպս դատելով Սերժ Սարգսյանի քայլերի տրամաբանությունից:
Բայց կա մի նրբերանգ՝ ապրիլի 9-ից մինչև ապրիլի 17-ը, երբ կլինի նոր վարչապետի ընտրությունը, իշխանությունը լինելու է հետաքրքիր իրավիճակում՝ Սերժ Սարգսյանը չի լինելու նախագահ և չի լինելու վարչապետ, իսկ Կարեն Կարապետյանը կլինի ժամանակավոր պաշտոնակատար: Ու թեև գործնականում շատերն են համարում, որ այդ յոթ օրը կլինի զուտ պայմանականություն կամ ֆորմալություն, այդուհանդերձ յոթ օր իշխանությունը կախված կլինի օդից, և այստեղ արդեն թե նորընտիր նախագահի, թե ժամանակավոր պաշտոնակատար վարչապետի պահվածքը, փոխհարաբերությունը, քայլերը դառնում են թերևս բավականին էական:
Ահա այդ տեսանկյունից Արմեն Սարգսյանի և Կարեն Կարապետյանի հանդիպումը պարունակում է իսկապես ուշագրավ ինտրիգ: Այդ հանդիպումը Սերժ Սարգսյանի համար երաշխիքնե՞րն է մեծացրել, որ յոթ օրը չի լինի տագնապային, թե՞ հակառակը, և հենց այդ պատճառով են Սարգսյանն ու Կարապետյանը հանդիպել Սերժ Սարգսյանի հետ, այսպես ասած, վերջնական որոշիչ հանդիպումից հետո, ոչ թե առաջ: