Ֆրանսիայի նախագահ Էմանուել Մակրոնը ենթադրել է, որ Մեծ Բրիտանիան կարող է Brexit-ից հետո ԵՄ–ի հետ հատուկ առևտրային գործարք կնքել։ Բայց զգուշացրել է, որ նա չի կարող միասնական շուկայից լիիրավ օգտվել, եթե չընդունի դրա պայմանները։
Բրիտանական հայտնի հեռուստալրագրող Էնդրյու Մարուի հետ զրույցում նա հայտարարել է, ինչպես դա արդեն արել է Բրյուսելը, որ Մեծ Բրիտանիան չի կարող «ընտրել» այն կետերը, որոնք իրեն են դուր գալիս։ Նրա խոսքերով՝ գործարքը միջին ինչ որ մի բան է՝ միասնական շուկայի և առևտրային համաձայնության արանքում։
Ֆրանսիայի նախագահը նշել է, որ Մեծ Բրիտանիան չպետք է միասնական շուկա մուտքի հնարավորություն ստանա, առանց դրա «նախնական պայմաններն» ընդունելու, որոնք ներառում եմ ԵՄ–ում ազատ տեղաշարժումը, բյուջետային վճարները և Եվրոպական դատարանի իրավասությունները։
«Միասնական շուկայում չպետք է լինի «սերուցքը քաշել», քանի որ դա նրա վախճանը կլինի»,– ասել է նա։
«Եթե դուք որոշեք չընդունել նախնական պայմանները, մուտքի լիարժեք հնարավորություն չեք ունենա։ Կարևորն այն է, որ մարդիկ հասկանան, որ չի կարելի միաժամանակ երկու աթոռի վրա նստել»։
Նա ասել է, որ Մեծ Բրիտանիան կարող է «ավելի խորը հարաբերություններ ունենալ» ԵՄ–ի հետ, քան մյուս երկրները, ինչպես նաև Նորվեգիայի հետ, բայց բացառել է միասնական շուկայից լիիրավ օգտվելու հնարավորությունը, քանի որ «բրիտանացիները որոշել են դուրս գալ»։
