Սերժ Սարգսյանը հունվարի 12-ին ընդունել է ԱԺ խորհրդի անդամներին և նրանց գործնականում տվել մինչև ապրիլ իշխանության գործողության ուղեցույցը, իհարկե՝ դե ֆակտո: ԱԺ խորհրդի կազմում են բոլոր խմբակցությունների ղեկավարներն ու ԱԺ հանձնաժողովների նախագահները, բնականաբար նաև ԱԺ նախագահն ու փոխնախագահները: Սերժ Սարգսյանի հետ հանդիպումից հրաժարվել էր «Ելք»-ի ղեկավար Նիկոլ Փաշինյանը՝ ասելով, որ ԱԺ նկատմամբ հարգանքը՝ հատկապես խորհրդարանական կառավարման մոդելի անցման պայմաններում, պահանջում էր, որ Սարգսյանը գար ԱԺ, ոչ թե ԱԺ խորհուրդը գնար Բաղրամյան 26:
Գործնականում Բաղրամյան 26-ում տեղի ունեցած հանդիպումը առնվազն ընդգծել է, որ նվազագույնը մինչև ապրիլ Հայաստանը նույնիսկ կիսանախագահական հանրապետություն չէ, այլ նախագահական: Սերժ Սարգսյանը հստակ ու բավական թափանցիկ ցուցումներ է տվել մինչև անգամ գնաճի վերաբերյալ լսումներ կազմակերպելու մասով:
Մյուս կողմից՝ այդ ամենը նրա ավելի վաղ արած այն հայտարարության տրամաբանության մեջ է, որ մինչև վերջին օրը լինելու է հանրապետության նախագահ և կատարելու է իր պարտականությունը: Բայց Հայաստանում, իհարկե, այդ առումով հարցեր կարծես թե այլևս չկան, և բոլոր հարցերը կապված են Սերժ Սարգսյանի նախագահության վերջին օրվան հաջորդող օրերի հետ: Այն, ինչ կատարվում է մինչև այդ օրը, գրեթե կասկած չի թողնում, որ Սարգսյանի դե ֆակտո նախագահության վերջին օրը, այսպես ասած, հետաձգվում է անորոշ ժամանակով: Մյուս կողմից՝ Սերժ Սարգսյանն ԱԺ խորհրդի անդամների հետ հանդիպմանը ասել է, թե պետք է սահմանափակվել մինչև ապրիլ իրավիճակի մասին խոսակցությամբ: Այսինքն՝ Սարգսյանը հայտարարել է, որ չի պատրաստվում խոսել հետնախագահական կամ հետապրիլյան պլանների մասին:
Ըստ էության ստացվում է, որ Հայաստանը խորհրդարանական կառավարման մոդելի է անցնում մի պարագայում, երբ այդ կառավարման մոդելում թիվ մեկ մանդատ տնօրինող խորհրդարանի, այսպես ասած, ղեկավար կազմը կամ Խորհուրդը Սերժ Սարգսյանի ցուցումներով և ուղեցույցով է կողմնորոշվում իր անելիքի մասին: Իսկ ո՞ր հասցեում է լինելու հետապրիլյան խորհրդարանական գործունեության ուղեցույցը՝ Բաղրամյան 26-ո՞ւմ դարձյալ, որտեղ գտնվելու է վարչապետի նստավայրը, թե՞ Մելիք-Ադամյան 2-ում, որտեղ լինելու է ՀՀԿ կուսակցապետի նստավայրը: Այդ հարցը, սակայն, ըստ ամենայնի Սերժ Սարգսյանի համար էլ մինչև վերջ պարզ չէ, իսկ նրա համար ներկայիս առանցքային խնդիրը կարծես թե անցումային սահուն և հարթ փուլի ապահովումն է:
Սարգսյանը վերջին շրջանում բավականին հաճախ է անդրադառնում այդ թեմային՝ թե՛ ահաբեկչության դեմ պայքարին հակազդելու և կայունությունը ապահովելու, թե՛ այժմ էլ խորհրդարանական գործունեության միջոցով սահուն և հարթ անցում ապահովելու տեսանկյունից: Արդյո՞ք դա նշանակում է, որ Սարգսյանն ապրիլին ընդառաջ սպասում է ֆորս-մաժորային զարգացումներ կամ, այսպես ասած, փորձեր, նախաձեռնություններ, թե՞ պարզապես պրոֆիլակտիկ աչալրջություն է ցուցաբերում, քանի որ մոտենում է եզրագիծը:
Չի բացառվում նաև, որ Սարգսյանի մտահոգությունը պայմանավորված է ապրիլի քաղաքական պլաններով և դրանց վերաբերյալ որոշումներով, և գուցե բացառել պետք չէ, որ Սարգսյանը նախապատրաստվում է որոշման, որի դեպքում հնարավոր է դիտարկում ոչ ֆորս-մաժորային արձագանքներ, ինչն էլ կանխարգելելուն պատրաստվում է բոլոր ուղղություններով: