Հայաստանում ավտոգազալիցքավորման ճնշակայաններում սեղմված բնական գազի դիմաց վճարման հաշվարկը փոփոխության կարիք ունի: Լրագրողների հետ հանդիպմանը հայտնեց «Սպառողների խորհրդատվության կենտրոն» հասարակական կազմակերպության նախագահ Կարեն Չիլինգարյանը:
«Վարորդները գազալցակայանների վերահսկման մեխանիզմ չունեն: Վարորդները ցուցմունքներին են նայում, տեսնում են` ինչ թիվ ցույց տվեց, ըստ այդմ` վճարում են` անկախ նրանից այդքան լիցքավորվել է, թե ոչ: Դա պետք է վերահսկեն պետական մարմինները»,-ասաց Կարեն Չիլինգարյանը:
Նա հույս հայտնեց, որ այս տարի հնարավոր կլինի հաշվարկը կատարել ոչ թե ըստ գազի ճնշման, այլ կշռի: «Կախված շրջակա միջավայրի ջերմաստիճանից, ճնշման տատանումը մեծ է լինում, հետևաբար պետք է հաշվարկը կատարվի ոչ թե ճնշման, այլ քաշը հաշվի առնելով` կիլոգրամներով: Ճնշումն ազդում է ոչ թե կշռի, այլ ծավալի վրա, այս տարվանից հուսով ենք կշռով կհաշվարկվի լցվող գազը»,-հավելեց բանախոսը:
Ինչ վերաբերում է վառելիքի թանկացման հետևանքով հասարակական տրանսպորտի սակագնի հնարավոր բարձրացմանը, ապա, ըստ բանախոսի, երթուղիները սպասարկողները կարող են պահպանել առկա սակագինը:
Սոցիալական հարթակներում օգտատերերը քննարկում են գազալցականների աշխատանքը վերահսկելու հարցերը: Մասնավորապես, Արման Ղարագուլյանն առաջարկում է չարաշահումներից զերծ մնալու համար սկսել գազալցակայանների ներքին մոնիտորինգ և քարտեզագրում: «Եկեք սկսենք գազալցակայանների միասնական տվյալների բազա սարքել, որտեղ կներմուծենք լիցքավորման պարամետրերը՝ գին, ճնշումը՝ լիցքավորման մեկնարկում եւ ավարտին, խորանարդ մետր, ջերմաստիճան և այլն: Արդյունքում կարծում եմ բավական հեշտությամբ կկարողանանք առանձնացնել բարեխիղճ կայանները մյուսներից»: