Հայաստանի և Եվրամիության միջև կնքված Համապարփակ և ընդլայնված գործընկերության համաձայնագիրն իսկապես պատմական է:
Այս մասին ԵՄ-Հայաստան խորհրդարանական համագործակցության հանձնաժողովի 17-րդ նիստի ավարտից հետո կայացած ասուլիսի ժամանակ ասաց ԵՄ-Հայաստան խորհրդարանական համագործակցության հանձնաժողովի համանախագահ Սաջադ Քարիմը` ընդգծելով, որ այն կաջակցի մի շարք ոլորտների, այդ թվում` ժողովուրդների միջև կապերի ամրապնդմանը, առևտրին, ներդրումներին, կրթությանը և այլն:
«Սա ճամփորդության միայն սկիզբն է: Սա ինքնին դեռևս նվաճում չէ. այն նվաճում է, որը թույլ է տալիս ընդլայնել և խորացնել արդեն գոյություն ունեցող հարաբերությունները, և մենք լիահույս սպասում ենք վավերացման գործընթացին»,-ասաց Սաջադ Քարիմը:
ԵՄ պաշտոնյան նշեց, որ ՀՀ խորհրդարանը ևս պետք է դեռ զգալի աշխատանք կատարի, որպեսզի համաձայնագիրը և դրա ներքո կատարվելիք աշխատանքը իրականացվի։
«Համաձայնագիրը ներառում է շատ լավ հիմք ֆինանսական օժանդակության ցուցաբերման համար ևս։ Մենք ավանդաբար «ավելին՝ ավելիի դիմաց» սկզբունքով ենք աշխատել, որն իր հետ ինչ-որ պայմաններ է բերում։ Հայաստանն այդ առումով պետք է ցույց տա, որ մեր կողմից նախանշված ոլորտներում ինքն առաջընթաց ունի», – նշեց Սաջաք Քարիմը` հիշեցնելով, որ բոլոր այդ ոլորտների հիմքում ընկած են Հայաստանի և հայերի ցանկությունները դեպի ապագայի զարգացումները, իսկ Եվրամիությունը պատրաստ է աջակցություն ցուցաբերել այդ հարցում:
ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը կարևորեց այն, որ ՀՀ խորհրդարանում դեկտեմբերի 19-20-ը անցկացվող ԵՄ-Հայաստան խորհրդարանական համագործակցության հանձնաժողովի 17-րդ նիստը կազմակերպվել է հենց անմիջապես ԵՄ-Հայաստան համաձայնագրի ստորագրումից հետո նման կարճ ժամանակահատվածում:
Արմեն Աշոտյանը տեղեկացրեց, որ նիստի ավարտին ընդունվել է երկկողմ խորհրդարանական համագործակցությանն առնչվող փաստաթուղթ, որն, ըստ նրա, շոշափում է համագործակցության ամբողջական օրակարգը՝ ՀՀ սոցիալ-տնտեսական խնդիրները, քաղաքական համակարգի շարունակական կատարելագործումը, անվտանգության և տարածաշրջանային խնդիրները։
«Ղարաբաղյան հակամարտության կարգավորման համատեքստում կողմերը վերահաստատել են այն հիմնական ուղերձը, որը գրված է ՀՀ-ԵՄ նոր համաձայնագրում՝ խնդիրը բացառապես պետք է լուծել խաղաղ ճանապարհով, Մինսկի խմբի համանախագահների ջանքերով և երեք սկզբունքներով՝ ուժի կամ ուժի սպառնալիքի չկիրառում, տարածքային ամբողջականություն և ազգերի ինքնորոշման իրավունք»,- ասաց նա:
Արմեն Աշոտյանը շեշտեց, որ փաստաթղթում հայկական կողմը նաև նշել է, որ հայ-թուրքական հարաբերությունները Ցյուրիխում ստորագրված արձանագրությունների միջոցով կարգավորելու Հայաստանի նախաձեռնությունը տապալվում է թուրքական կողմի ոչ կառուցողական մոտեցման, նախապայմանների լեզվով խոսելու պատճառով:
