Ադրբեջանի նախագահ Իլհամ Ալիևն այսօր ընդունել է Իրանի արտգործնախարար Մուհամմադ Ջավադ Զարիֆի գլխավորած պատվիրակությանը, հայտնում է պետության ղեկավարի պաշտոնական կայքը։
Այցի հիմնական նպատակն է Իրանի դիվանագիտական գերատեսչության ղեկավարի մասնակցությունը թուրք և ադրբեջանցի գործընկերների հետ եռակողմ հանդիպմանը, որը տեղի կունենա Բաքվում, դեկտեմբերի 20-ին։ Դա այդ ձևաչափով 5-րդ հանդիպումը կլինի։
Ինչպես հայտնում է IRNA գործակալությունը՝ հղում անելով Իրանի ԱԳՆ մամլո ծառայությանը, հանդիպմանը ծրագրվում է տնտեսական փոխհարաբերությունների զարգացման քննարկում տարանցման, տրանսպորտի, էներգետիկայի, մաքսային ոլորտներում։ Կքննարկվեն նաև տեխնիկական և առևտրային ոլորտներում փոխադարձ հետաքրքրություն ներկայացնող այլ հարցեր։
Իրանի, Թուրքիայի և Ադրբեջանի արտգործնախարարները կուսումնասիրեն, մասնավորապես, քաղաքական և տարածաշրջանային համագործակցությունը, խաղաղության ու կայունության ամրապնդման ուղիները։
Բացի այդ, իրանցի նախարարը Բաքվում մի շարք երկկողմ հանդիպումներ կանցկացնի, այդ թվում Ադրբեջանի արտգործնախարար Էլմար Մամեդյարովի և Թուրքիայի արտգործնախարար Մևլյութ Չավուշօղլուի հետ։
