Հայաստանում սնունդը բարելավելու և թերսնուցումը նվազեցնելու ուղղությամբ դպրոցներին կից ջերմատներ կկառուցվեն: ՀՀ գյուղատնտեսության նախարար Իգնատի Առաքելյանն ու Հայաստանում ՄԱԿ-ի պարենի և գյուղատնտեսության կազմակերպության ներկայացուցիչ Ռայմունդ Յելեն դեկտեմբերի 12-ին ստորագրեցին «Կովկասի և Կենտրոնական Ասիայի ընտրված երկրներում պարենային ապահովությանը և սնուցմանն ուղղված կարողությունների հզորացում» ծրագրային փաստաթուղթը:
Փաստաթղթի ստորագրումից հետո նախարար Իգնատի Առաքելյանը նշեց, որ ծրագրի իրագործման համար Ռուսաստանի Դաշնությունը 1 միլիոն 400 հազար դոլար է տրամադրել, որից 60 տոկոսից ավելին կուղղվի ծրագրի իրագործմանը, մնացածը՝ վերապատրաստման և տեխնիկական աջակցության աշխատանքներին: «Ջերմատները կառավարելու իրավունքը կտրվի տվյալ դպրոցին, և այդ դպրոցներում արտադրված բանջարեղենը կամ այլ գյուղատնտեսական մշակաբույսը կօգտագործվի հենց դպրոցականների սննդի ուղղությամբ: Ծրագիրը դեռևս փորձնական է, այն 2018 թվականին կիրականացվի մարզային երեք դպրոցներում»,-ասաց նախարարը:
Նա ծրագրի իրագործման երկու բաղադրիչ առանձնացրեց: Առաջին. դպրոցներին կից կկառուցվեն փոքր, միջին և մեծ ջերմոցներ՝ հասկանալու համար դրանց արդյունավետությունը: Արդյունքում լավագույն մոդելը կկիրառվի նաև այլ դպրոցներում: «Այս ծրագրի երկրորդ բաղադրիչը գյուղերում սոցիալ-անապահով խավի զբաղվածության կազմակերպումն է: Դա կարող է լինել ուղղակի գումարի տրամադրում սոցիալապես անապահով բնակչությանը կամ որևէ ընտանիքի, բայց պայմանը լինելու է հետևյալը, որ այն ընտանիքը, որը կհամաձայնի մասնակցել այս ծրագրի իրագործմանը, ծրագրի ավարտից հետո պետք է դուրս գա սոցիալ-անապահով ընտանիքի ցուցակից: Իրենց համար նախատեսված է ֆինանսական աջակցություն, վերապատրաստում, ուսուցում»,-հավելեց Իգնատի Առաքելյանը:
«Կովկասի և Կենտրոնական Ասիայի ընտրված երկրներում պարենային ապահովությանը և սնուցմանն ուղղված կարողությունների հզորացում» ծրագրի իրագործմանը կաջակցեն նաև Կրթության և Աշխատանքի ու սոցիալական հարցերի նախարարությունները:
