«Եթե իշխանություններն ընդունեն ՀԱԿ կողմից երկխոսության վերաբերյալ առաջարկը, դա փաստացի կնշանակի երկրում երկիշխանության համակարգի գործելու սկիզբ»,- «Առաջին լրատվականի» հետ զրույցում, անդրադառնալով ՀԱԿ-իշխանություն երկխոսության վերաբերյալ վերջին զարգացումներին, տարաբնույթ հայտարարություններին, նման կարծիք հայտնեց թատերագետ, հրապարակախոս Արա Նեդոլյանը։
Ըստ նրա՝ երկխոսության գնալու դեպքում, նախ, իշխանությունը հարկադրված կլինի կողմնորոշվել, թե ով է կամ որն է իշխանությունը, ով իրավունք ունի բանակցել և որոշումներ կայացնել, քանի որ «իրականում իշխանությունը պատկանում է օլիգարխիկ դաշինքին, որի կառուցվածքը և փոխհարաբերությունները ոչ մի առնչություն չունեն սահմանադրորեն կարգված կառույցների հետ»։
«Երբ իշխանությունը ղեկավարվում է ոչ սահմանադրական սկզբունքներով, նրա ներսում անընդհատ գնում է ազդեցության համար պայքար, իրավասությունները բաժանված ու ֆիքսված չեն»,- նշում է Արա Նեդոլյանը և հավելում, որ նման պարագայում, բնականաբար, իշխանությունը գոնե սկզբում կգերադասի խոսել, դատարկախոսել բանակցությունների վերաբերյալ և չգնալ այդ բանակցություններին։
