ԱԺ «Ելք» խմբակցության պատգամավոր Էդմոն Մարուքյանն այս պահին Հայաստան-ԵՄ համաձայնագրի չստորագրման որևէ առիթ չի տեսնում: Նրա խոսքերով՝ համաձայնագրի ստորագրումից հետո կլինի այնքան համագործակցություն, որքան կլինի բարեփոխում. «Պարզ է, որ այս համաձայնագիրը և այն գործողությունները, որ պետք է իրականացվեն, չեն կարող հակասել ԵԱՏՄ համաձայնագրին, և որտեղ կլինի հակասություն, դրանք չեն գործելու Հայաստանի համար»,- ասաց պատգամավորը:
Նրա խոսքերով՝ սա կոմպլեքս գործողությունների ծրագիր է, որ Հայաստանը կարող է տարիներ շարունակ իրականացնել. որքան լավ իրականացնի, այնքան շահ կստանան Հայաստանը, ՀՀ քաղաքացիները:
Այնուամենայնիվ, եթե պայմանագիրը ստորագրվեց, այն կյանքի է կոչվելու, իսկ թե քանի տոկոսը կյանքի կկոչվի, ընդդիմադիր պատգամավորի խոսքերով՝ ամեն ինչ կանեն, որ կատարողականը բարձր լինի:
«Սա մեզ համար բացառիկ հնարավորություն է, որ ԵՄ-ն, դուռը չփակելով, Հայաստանին մեջքով շրջվելուց հետո, արձանագրում է այդ դուռը չփակելը նմանատիպ համաձայնագրով և ասում է, այո՛, կարող ենք շարունակել համագործակցությունը: Հիմա այդքանից հետո էլ ի՞նչ անեն ՀՀ համար, մի պետության համար, որ ԵԱՏՄ անդամ է, ԱՊՀ անդամ է, ՀԱՊԿ անդամ է, և սա բացառիկ բան է, որևէ ԵԱՏՄ պետություն հնարավորություն չունի նման փաստաթուղթ ստորագրելու: Մենք այսօր ունենք, և այս պատմական շանսից պետք է օգտվել»,- հավելեց նա:
Հարցազրույցն ամբողջությամբ՝ տեսանյութում: