Ավստրիայի «Արարատ» մարզական միության նախագահ Սեպուհ Բաղդոյանը Հայաստան-Սփյուռք վեց համաժողովներին էլ ներկա է եղել: «Առաջին լրատվական»-ի հետ զրույցում նա նշեց, որ թեև այս համաժողովները շատ ակնկալիքներ չեն լրացվել, բայց լիահույս է, որ արդյունքները չեն ուշանա: Սեպուհ Բաղդոյանը նշեց, որ ունի մտահոգություններ. «Երբ Ավստրիայում կամ Գերմանիայում մոտենում եմ ոչ հայկական կազմակերպությունների, ընկերությունների, որպեսզի խրախուսեմ՝ նրանք Հայաստանում ներդրումներ անեն, առաջին մտահոգությունն այն է, որ այստեղ կաշառակերությունն այնքան բարձր է և այնքան անտանելի, որ իրենք ոչ մի ժամանակ հանդգնություն չունեն մոտենալու: Պարոն Սարգսյանը, պարոն վարչապետը իրենց խոսքն ասացին այս ուղղությամբ, բայց ես շոշափելի երևույթ չեմ տեսնում: Մենք պետք է այնպիսի մեխանիզմ ունենանք, որ մարդկանց ասենք՝ ըհը՛, տեսեք ինչ քայլեր ենք արել կաշառակերության դեմ, և դուք կարող եք վստահել մեր այստեղի ներդրողների բիզնեսի ոլորտին»,- ասաց նա:
Նա նշեց, որ մինչև վերջերս վստահություն չկար, բայց Սերժ Սարգսյանի և Կարեն Կարապետյանի նոր մոտեցումները հավանաբար իրենց տեղը կգտնեն և կաշառակերությունը մեծ թափով կպակասի:
Արդյո՞ք Հայաստանը 4 միլիոն բնակչություն կունենա 2040-ին՝ նա նշեց, որ Հայաստան վերադառնալը պետք է տարբեր կերպ ընկալել. «Ես տարին առնվազն չորս ամիս այստեղ եմ, մեր համայնքում շատերը թոշակառու, գալիս են Հայաստան: Եթե Հայաստանը հրապուրիչ լինի, եթե արդարությունը և վստահությունն ուժեղանա, հավատացած եմ, որ շատերը կմտածեն գալու մասին»,- հավելեց նա:
Հարցազրույցն ամբողջությամբ՝ տեսանյութում:
