Սպիտակի քաղաքապետ Գագիկ Սահակյանն ու իր ղեկավարած ավագանին են հաստատել Սպիտակի վերելակների գործարանի քանդման թույլտվությունը: Քաղաքապետը «Առաջին լրատվական»-ի հետ զրույցում ասաց, որ թույլտվության տրամադրման համար հիմք են հանդիսացել ներկայացված բոլոր փաստաթղթերը:
Երբեմնի հզոր գործարանը, որը կառուցվել է 1988 թվականի երկրաշարժից հետո, ներկայումս ավերակի է վերածվել: 2003 թվականին՝ ՀՀ երկրորդ նախագահի օրոք և նրա հրամանագրով, «Սպիտակի վերելակաշինական գործարան»-ը մասնավորեցվել է, և դրա սեփականատերն էր դարձել Քաջարանի պղնձամոլիբդենային գործարանը: Ներկայումս էլ այն պատկանում է Հակոբյաններին:
Նախօրեին Զարուհի Փոստանջյանի ղեկավարած «Երկիր ծիրանի» կուսակցությունը հաղորդագրությամբ տեղեկացրել էր, որ «Զանգեզուրի պղնձամոլիբդենային կոմբինատ» ՓԲԸ-ն 2,493 հա մակերեսով տարածքի վրա կատարում է Սպիտակի վերելակաշինական գործարանի ապօրինի քանդման աշխատանքներ, որի վերաբերյալ քանդման թույլտվություն չունի: Սպիտակի քաղաքապետը, սակայն, ինչպես արդեն նշեցինք, մեզ հետ զրույցում ասաց, որ քանդողները թույլտվություն ունեն, իրենք են այն տրամադրել: «Քանդման թույլտվությունը տրամադրել է քաղաքի ավագանին, քանի որ սեփականատիրոջ կողմից ներկայացվել են բոլոր այն փաստաթղթերը, որ պահանջվում է շինությունը քանդելու համար»,- ասաց քաղաքապետը՝ ընդգծելով, որ գործարանը չեն քանդում վաճառելու համար, այլ քանդում են շինանյութերը, գործարանի ներսում եղած հաստոցները իրենց մոտ՝ Զանգեզուրում, հավաքելու և օգտագործելու նպատակով:
Գագիկ Սահակյանի խոսքով՝ իրենք ուրախ կլինեին, որ գործարանը վերականգնվեր, այն քաղաքին օգուտ կտար, աշխատատեղեր կբացվեին, քանի որ նմանատիպ մեկ այլ գործարան Հայաստանում չկա, բայց վերականգնելու համար նախ՝ ներդրող չկա, և հետո՝ գործարանի արտադրանքի պահանջարկ չկա շուկայում:
«Դուք ոնց եք մտածում՝ ով պետք է վերականգնի: Շուկան պետք է թույլ տա, որ գործարանը վերականգնվի: Ես անգամ վստահ եմ, որ պահանջարկ լինի՝ ներդրող էլ կգտնվի: Բայց եթե շուկա չկա՝ ներդրողն էլ չկա: Այնպես որ, ավելորդ բաներ են խոսում, որ պետք չի: Ընդամենը դելիկատնի մակարդակի խոսակցություններ են, թե գործարանը բացելու տեղը քանդում են»,- նշեց Սպիտակի քաղաքապետը:
Գագիկ Սահակյանը նշեց, որ Սպիտակի վերելակների գործարանի տեղում Զանգեզուրի գործարանի սեփականատերը պլանավորում է 600 միլիոն դրամի ներդրում կատարել: Քաղաքապետը, սակայն, չհստակեցրեց, թե կոնկրետ ինչ է կառուցվելու նախկին գործարանի տեղում՝ աշխատատեղեր կբացվե՞ն դրա արդյունքում, թե՞ ոչ: «Դե հիմա չասեմ, փակագծերը չբացեմ, թե ինչէ լինելու, բայց 600 միլիոն դրամի ներդրում է կատարվելու»,- ասաց նա՝ չմասնավորեցնելով նաև ներդրումների ժամկետները:
Նշենք, սակայն, որ ըստ խոսակցությունների՝ գործարանի տեղում մարզադաշտ է կառուցվելու և մեկ բնակելի շենք: Նշենք նաև, որ ըստ 2003-ին կազմված մասնավորեցման փաստաթղթի՝ Քաջարանի պղնձամոլիբդենային գործարանը պարտավորվել է 2 տարվա ընթացքում կատարել 450 000 միլիոն դոլարի ներդրում, ապահովել 270 նոր աշխատատեղ՝ 35 000 դրամ միջին աշխատավարձով: Այս պարտավորությունը, սակայն, այդպես էլ կյանքի չի կոչվել, ոչ էլ գործարանը վերագործարկելու վերաբերյալ այս տարիների ընթացքում տարբեր պաշտոնյաների շուրթերից հնչած խոստումները:
Զարուհի Փոստանջյանի համար, սակայն, զարմանալի են գործարանը քանդելու համար որպես հիմնավորում ներկայացվող շուկայի պահանջարկ չլինելու վերաբերյալ պնդումները: Նրա խոսքով՝ Երևանում և այլ քաղաքներում գրեթե բոլոր վերելակները կարիք ունեն փոխարինման: «Նման կառույց ունենալով և քանդելով այն՝ Հայաստանի Հանրապետությունում գործող ապօրինի իշխանությունները իրականացնում են ապազգային քաղաքականություն»:
