ՀՀ պաշտպանության նախարարի առաջին տեղակալ Արտակ Զաքարյանն օգոստոսի 17-ին ՀՀ-ում ՌԴ արտակարգ և լիազոր դեսպան Իվան Վոլինկինի, ՀՀ Արագածոտնի մարզպետ Աշոտ Սիմոնյանի, Հայ առաքելական եկեղեցու ներկայացուցիչների և բազմաթիվ հյուրերի հետ մասնակցել է Օշականի ճակատամարտի 190-րդ տարեդարձին նվիրված հանդիսավոր միջոցառմանը: Պաշտպանության նախարարի առաջին տեղակալը կարևորել է ամեն տարի այստեղ հավաքվելով` հաղթանակի համար զոհվածների հիշատակը ոգեկոչելու ավանդույթի ձևավորման անհրաժեշտությունը։ Անտեղյակ ընթերցողի համար ասենք, որ այսպես` մեծ շուքով, հանդիսավորապես ու պաշտոնապես, նշվել է մի հաղթանակ, որը երկու հարյուր տարի առաջ հայերն ու ռուսները տարել են պարսիկների հանդեպ: Այս հաղթանակը հայերի համար քաղաքական նշանակություն չի ունեցել անգամ այն օրերին, էլ ուր մնաց` հիմա: Ակնհայտ է, որ երեկվա «տոնակատարությունը» քաղաքական ենթատեքստ ունի, որը բացարձակապես չի բխում Հայաստանի շահերից:
Երկու ենթադրություն կարող ենք անել: Շատ հնարավոր է, որ Օշականի հաղթանակը «ռեստարտ» են արել ռուսները` նպատակ ունենալով խոչընդոտել հայ-իրանական հարաբերությունների զարգացմանը, մանավանդ, որ վերջին շաբաթներին դարձյալ ակտիվացել էին խոսակցությունները Հայաստանի տարածքով իրանական գազի տարանցման մասին: Սակայն հնարավոր է նաև, որ սա եղել է հայկական կողմի նախաձեռնությունը: Ի վերջո, մենք ունենք ռուսահպատակ քաղաքական համակարգ, որը գուցե այս կերպ երախտապարտ է եղել Ռուսաստանին, որ նա կատարել է իր պայմանագրային պարտավորությունները և մեկ ինքնաթիռով մասնակցել է Խոսրովի անտառի հրդեհի մարմանը:
Օշականի երեվա ցուցադրական միջոցառումից հետո` ո՞վ կհավատա, որ Հայաստանի իշխանություններն իսկապես շահագրգիռ են Իրանի հետ հարաբերությունները խորացնելու հարցում, կամ արդյո՞ք Թեհրանում լուրջ կվերաբերեն մի գործընկերոջ, որն ամբողջ օրը խոսում է հայ-իրանական հարաբերությունները զարգացնելու անհրաժեշտության մասին, սակայն ակնհայտ հակաիրանական միջոցառում է կազմակերպում պետական մակարդակով: Վրացիներն իրենց պատմության սովետական, անգամ ռուսական ժամանակաշրջանը հռչակել են օկուպացիա, իսկ հայերն առիթ են փնտրում ռուսներին քծնելու համար: Ռուսի ստրուկն ենք ու վերջ, մնացածը` հեքիաթ է: