Ռուսաստանը մշտապես աջակցել է ղարաբաղյան հակամարտության գոտում լարվածության նվազեցման միջոցառումներին՝ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ՝ փոխանցում է rusarminfo-ն։
«Ռուսաստանում ղարաբաղյան թեմային առանձնահատուկ ուշադրություն է դարձվում։ Այն դասվում է մեր արտաքին քաղաքական առաջնահերթությունների թվին։ Այն առկա է նաև Ռուսաստանի արտաքին քաղաքականության հայեցակարգում։ Մեր կողմից մենք անում ենք հնարավոր ամեն բան՝ կայունացնելու իրավիճակն ու շարունակելու բանակցությունները»,-ասել է Զախարովան։
Նրա խոսքով՝ ներկայում համանախագահներն աշխատում են ԼՂ հակամարտության քննարկման համար գագաթնաժողովի կազմակերպման ուղղությամբ։
ՌԴ ԱԳՆ պաշտոնական ներկայացուցիչը նաև նշել է, որ խնդրի լուծման՝ միջնորդների առաջարկած քայլերի իրագործումը կախված է հակամարտող կողմերի բարի կամքից։
