«Ժառանգություն» կուսակցության վարչության անդամ Սուսաննա Մուրադյանի տեղեկացմամբ՝ խորհրդարանական ընտրություններին դաշինքով մասնակցած Րաֆֆի Հովհաննիսյանը, Սեյրան Օհանյանը և Վարդան Օսկանյանը միասին կպայքարեն Սերժ Սարգսյանի իշխանության հնարավոր վերարտադրության դեմ: Եթե ուշադրություն դարձրեցիք, տիկին Մուրադյանը չի օգտագործում անգամ իշխանափոխություն բառը՝ կենտրոնանալով բացառապես Սերժ Սարգսյանի անձի վրա: Թերևս սա է Րաֆֆի Հովհաննիսյանի «թավշյա հեղափոխության» գլխավոր առանձնահատկությունը:
Ավելի անկեղծ կլիներ, եթե «Ժառանգությունում» խոստովանեին, որ իրենց նպատակը Կարեն Կարապետյանին վարչապետ կարգելն է, որովհետև եթե չի փոխվում ներքաղաքական այսօրվա ստատուս քվոն, ապա Սերժ Սարգսյանի միակ այլընտրանքը Կարեն Կարապետյանն է:
ՕՐՕ-ն ռեստարտի հիանալի հնարավորություն է ստացել, միայն թե անհասկանալի է, թե քաղաքական «լուզերի» մոտ ի՞նչն է փոխվել, որ խորհրդարանական ընտրությունների ձախողումից հետո որոշել են կրկին փորձել՝ հայտնի գովազդի մոտիվներով: Զարմանալի է նաև, որ գոնե այս հարցում ՕՐՕ-ն ու «Ելք»-ը ընդհանուր ճակատ չեն կազմում, որովհետև խորհրդարանական ընդդիմության 2018-ի օրակարգը սկզբունքորեն նույնն է:
Քաղաքական այս անմեղսունակությունը սկզբունքորեն երկու բացատրություն ունի. կա՛մ մոսկովյան ինչ-որ շրջանակներ որոշել են վարչապետի պաշտոնը թանկ «վաճառել» Սերժ Սարգսյանի վրա ու արհեստականորեն բարձրացնում են Կարեն Կարապետյանի քաղաքական գինը, կա՛մ էլ ՕՐՕ-ի լիդերները իրենք են տրվում Կարապետյանին, մանավանդ, որ Ռոբերտ Քոչարյանի ֆինանսավորման աղբյուրը ցամաքել է:
Տեսականորեն, իհարկե, այս ամենը կարող է կազմակերպել Սերժ Սարգսյանը, որպեսզի 2018-ի ապրիլից հետո «գենսեկի» իշխանությունը վայելի առանց պատասխանատվության:
