Ֆուտբոլի Հայաստանի ազգային հավաքականը վաղն իր պատմության կարևորագույն հանդիպումներից մեկը կանցկացնի՝ աշխարհի առաջնության ընտրական փուլի շրջանակներում Պոդգորիցայում մրցելով Մոնտենեգրոյի ազգային թիմի հետ: Հաղթանակի դեպքում մեր հավաքականը կունենա 9 միավոր և լուրջ հայտ կներկայացնի ենթախմբում երկրորդ հորիզոնականը գրավելու:
Այս պահին ընտրական խմբում 5-րդ տուրից հետո առաջատարը Լեհաստանն է, որն ունի 13 միավոր: Երկրորդ և երրորդ հորիզոնականները 7-ական միավորով կիսում են Դանիան և Մոնտենեգրոն, իսկ Հայաստանն ու Ռումինիան 6-ական միավորով կիսում են 4-րդ և 5-րդ հորիզոնականները: Մրցաշարային աղյուսակը եզրափակող Ղազախստանն ունի 2 միավոր: Իրավիճակն այնպիսին է, որ 6-րդ տուրում պարտություն կրելու դեպքում Հայաստանի հավաքականը կհայտնվի ծանր իրավիճակում: Նշենք, որ հաղթանակն իրատեսական է, մենք արդեն հաղթել ենք Մոնտենեգրոյի հավաքականին:
Փորձենք հասկանալ մեկնարկային ինչպիսի կազմով մեր հավաքականը կներկայանա ֆուտբոլային պատերազմին: «Առաջին լրատվական»-ի վարկածով՝ դարպասում կլինի Արսեն Բեգլարյանը, իսկ պաշտպանության կենտրոնում՝ Տարոն Ոսկանյանն ու Գաել Անդոնյանը: Պաշտպանության աջ եզրում կխաղա Հրայր Մկոյանը, իսկ ձախից՝ Արտակ Եդիգարյանը: Հենակետայինի դիրքում հանդես կգա երևանյան խաղում Մոնտենեգրոյի դարպասն առաջին գնդակն ուղարկած Արտակ Գրիգորյանը, իսկ կիսապաշտպանության կենտրոնում՝ Հենրիխ Մխիթարյանը: Ենթահարձակվողի դիրքում Արթուր Պետրոսյանը կօգտագործի Մարկոս Պիզելիին, իսկ որպես նոմինալ հարձակվող կխաղա Ռուսլան Կորյանը: Առջևի գծում աջ եզրից հանդես կգա Կամո Հովհաննիսյանը, իսկ ձախից՝ Տիգրան Բարսեղյանը:
Կարծում ենք՝ Մոնտենեգրոյի դեմ Հայաստանի ազգային հավաքականի կազմում կտեսնենք նաև Էդգար Մանուչարյանին և Արաս Օզբիլիսին: Հունիսի 5-ին Երևանում կայացած Սենտ Քիթս և Նևիսի հետ ընկերական հանդիպումից հետո Արթուր Պետրոսյանը մասնավորապես հայտարարել էր, որ Օզբիլիսը ֆունկցիոնալ առումով այնքան էլ լավ վիճակում չէ և պատրաստ չէ 90 րոպե խաղալ: Ակնհայտ է, որ որակական առումով Մանուչարյանը և Օզբիլիսը գերազանցում են Բարսեղյանին և Հովհաննիսյանին: Մեր հավաքականի գլխավոր մարզիչը, սակայն, բազմիցս է նշել է, որ մեկնարկային կազմի ընտրության հարցում նախապատվությունը տալիս է այն խաղացողներին, ովքեր տվյալ պահին լավ մարզավիճակում են:
Երկրորդ կեսում հնարավոր է խաղադաշտում տեսնենք նաև հարձակվող Արթուր Սարկիսովին: Ռուսլան Կորյանը որոշ դրվագներում լավ տպավորություն է թողնում, բայց կարծում ենք՝ նա դեռևս չի գտել իր խաղը Հայաստանի ազգային հավաքականում: Սարկիսովը, շնորհիվ բարձր արագության, մշտապես լարվածություն է ստեղծում մրցակցի պաշտպանության օղակում:
Առաջիկա մրցավեճում բնականաբար շատ բան է կախված հավաքականի ավագ Հենրիխ Մխիթարյանից: Վերջինս փորձելու է դաշտի կենտրոնական մասում գրոհները զարգացնելու ժամանակ համագործակցել Մարկոս Պիզելիի հետ: Վերջինս ևս խաղային պրակտիկայի խնդիր ունի, սակայն կարծում ենք՝ Արթուր Պետրոսյանը նրան հիմնական կազմում դաշտ դուրս կբերի, որպեսզի աշխատի Մխիթարյան-Մարկոս խաղային դուետը կիսապաշտպանությունում:
Այս մրցավեճում մեծ է լինելու նաև հենակետային կիսապաշտպան Արտակ Գրիգորյանի դերը: Եթե նրան հաջողվի վերահսկել իրավիճակը խաղային այս դիրքում, ապա Մխիթարյանը հնարավորություն կունենա առաջ շարժվելու: Մեր հավաքականի պաշտպանության գիծը իդեալական չես համարի՝ մանավանդ, որ բացակայում է Վարազդատ Հարոյանը: Ամեն դեպքում Եդիգարյան-Անդոնյան-Ոսկանյան-Մկոյան խաղային օղակը այսօրվա դրությամբ, կարծում ենք, ամենաօպտիմալ լուծումն է: Այս ֆուտբոլիստները կարծես թե պրակտիկայի պակաս չունեն և լավ մարզավիճակում են: Ինչ վերաբերում է Հայաստանի ազգային հավաքականի դարպասապահին, ապա այս դիրքում տիրող պատկերը թողնում ենք առանց մեկնաբանության:
