«Ամոթ է, Վրաստան», «Սոկարթվելո», «Ազատություն Աֆգանին»՝ նման վերտառությամբ ցուցապաստառներով ադրբեջանական, վրացական մի շարք հասարակական կազմակերպություններ այսօր Վրաստանի կառավարության շենքի դիմաց համերաշխության ակցիա անցկացրին՝ հաջակցություն ադրբեջանցի լրագրող, ակտիվիստ Աֆգան Մուխթարլիին: Ակցիայի մասնակիցները խորհրդանշորեն գլուխները ծածկել էին պոլիէթիլենային պարկերով՝ ներկայացնելով ադրբեջանցի լրագրողների լուսանկարները և ցուցապաստառներ:
Ակցիային մասնակցում էր նաեւ Մուխթարլիի կինը՝ Լեյլա Մուսթաֆաևան, վերջինս ցուցադրեց ամուսնու անձնագիրը, առանց որի էլ նրան առևանգել են Թբիլիսիից Բաքու.
«Վրաստանի իշխանություններին ուզում եմ ասել ամոթ, քանի որ նրանք սահմանափակում են խոսքի ազատությունը, նրանք փոխանցել են Ադրբեջանին լրագրողին՝ առանց որեւէ հիմքի: Երկրի համար, որը սերտ հարաբերություններ ունի Եվրամիության հետ, սա անընդունելի է»,- ասել է Լեյլա Մուսթաֆաևան։
Ակցիային ներկա են եղել ինչպես տարբեր ՀԿ-ների եւ փոքրամասնությունների ներկայացուցիչներ, այնպես էլ քաղաքական գործիչներ:
Հիշեցնենք, մայիսի 29-ին իր սեփական տան հարակից տարածքում ադրբեջանցի լրագրող, ակտիվիստ Աֆգան Մուխթարլին առևանգվել է: Վերջինիս փաստաբանները կարծում են, որ գործընթացում խառնված են եղել ինչպես ադրբեջանական, այնպես էլ նաև վրացական հատուկ ծառայությունները:
Մուխթարլին հայտնի է որպես Ադրբեջանի իշխանություններին քննադատող: 2015 թվականից նա ստիպված է եղել բնակվել Թբիլիսիում: Մուխթարլին զբաղվում էր Ադրբեջանի նախագահ Իլհամ Ալիևի ընտանիքի` Վրաստանում ունեցած բիզնես կարողությունների հետաքննությամբ: