«Իրավաբանների հայկական ասոցիացիա» ՀԿ նախագահ Կարեն Զադոյանը կարևորում է ՀՀ-ում իրապես հակակոռուպցիոն մարմնի ստեղծումը: «Առաջին լրատվական»- ի հետ զրույցում անդրադառնալով հարցին՝ Հայաստանում արդյո՞ք կան դրա նախադրյալները՝ հաշվի առնելով, որ երկրում ամենաբարձր օղակից մինչև ամենացածր օղակ նույն խաղի կանոններով են գործում, և կոռուպցիան ամենուր է, Կ. Զադոյանը նշեց. «Մենք արդեն մոտ 9 տարի պայքարում ենք, բարձրաձայնում ենք այն մասին, որ շատ կարևոր է երկրում ինստիտուցիոնալ համակարգեր, մեխանիզմներ ներդրվեն կոռուպցիայի դեմ արդյունավետորեն պայքարելու և արյունքներ գրանցելու համար»:
Նրա խոսքով՝ այդ կառուցակարգերից մեկը անկախ հակակոռուպցիոն մարմինն է, որը պետք է իրապես անկախ լինի. «Եթե միայն անվանումն է անկախ, բայց չի ձևավորվել և չի ապահովվելու այդ մարմնի անկախությունը և չի ունենալու հանրային բարձր վստահություն, այդ մարմինը չի կարող արդյունավետորեն պայքարել և գրանցել լուրջ արդյունքներ»:
Զադոյանի խոսքով՝ ուսումնասիրելով կոռուպցիայի դեմ պայքարի միջազգային փորձը՝ Կոռուպցիայի դեմ պայքարի խորհրդում իրենք ներկայացրել են 2 մոդելներ՝ ունիվերսալ և կանխարգելիչ:
«Հարցը բարձրաձայնվել է, թե որ մոդելը կիրառելի կլինի Հայաստանում, սակայն մինչև այսօր Կոռուպցիայի դեմ պայքարի խորհրդում, որը համարում եմ մասնագիտացված հարթակ, հարցը չի քննարկվել»,- նշեց Կ. Զադոյանը՝ հավելելով, որ անհասկանլի էր, թե ինչու էր անհրաժեշտ թողնել այդ ամենը կիսատ և ստեղծել նոր աշխատանքային խումբ՝ չներառելով ոլորտի ՔՀԿ-ներին:
Մանրամասները՝ տեսանյութում: