«Մի քանի տարի առաջ ասել եմ՝ Հայաստանում քաղաքական դաշտը հնարավոր է կայանա, եթե դաշտից դուրս գան երեք նախագահները։ Հիմա, կարծես թե բանը դրան է տանում՝ երկուսը խաղից դուրս մնացին այսպես կոչված վերջին թատերական ներկայացմամբ՝ ԱԺ ընտրություն կոչվածով․ մնացել է երրորդի հարցը լուծվի ու ժողովուրդն ազատագրվի։ Քոչարյանի վերադարձը կնշանակի վերադարձ հին ջրաղացին», -«Առաջին լրատավական»-ի հետ զրույցում անդրադառնալով երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանի հայտարարությանն առ այն, որ Քոչարյանի վերադարձի համար որևէ օբյեկտիվ խոչընդոտ չկա՝ ասաց «Ժողովրդավարական հայրենիք» կոսակցության ղեկավար Պետրոս Մակեյանը։
Մեր այն դիտարկմանը, թե Սողոմոնյանը մատնանշում է հարցումներ, ըստ որի ժողովուրդը դրական է վերաբերվում Քոչարյանին և նրա նախագահության օրոք ունեցած ձեռբքերումներին, Պետրոս Մակեյանն արձագանքեց.«Իսկ այդ հարցումները Հոկտեմբերի 27-ը, Մարտի 1-ը, մնացած բոլոր սպանությունների ու ջարդերի մասին հարցումներ ներառե՞լ են։ Այսօրվա բուրգի ճարտարապետն ու հիմնադիրը եղել է Քոչարյանը, հիմա էլ Սերժը միս ու արյուն է տալիս։ Լուրջ պետք ուսումնասիրել, որ այդ երկուսի մեջ տարբերություն գտնես։Համակարգը պետք է քանդվի ու փլուզվի իրենց գլխին, ոչ թե մտածեն հետ վերադառնալու մասին։ Մեզ մնացել է մտածել մինչև Սարգսյանի նախագահության ավարտը նրանից վերջնականապես ազատվելու մասին․ բոլոր երեք նախագահներն էլ պետք է հեռանան, որ ժողովուրդը նորմալ ապրի»,-եզրափակեց նա։