Մամուլը վերջին շրջանում անընդհատ գրում էր, որ ՕՐՕ դաշինքը գնում է հետընտրական զարգացումների և չի բացառում Սասնա ծռեր 2 սցենարը, և Սամվել Բաբայանը բավականին կոշտ հայտարարություններով էր հանդես գալիս՝ ասելով, որ եթե իշխանությունը այսպես շարունակի կարող է արյունահեղություն լինել: Անդրադառնալով այս դիտարկմանը՝ «Առաջին լրատվական»-ի հետ զրույցում «Ազգային անվտանգություն» կուսակցության նախագահ Գառնիկ Իսագուլյանը նշեց. «Իմ նախկին հարցազրույցներում ես մի քանի անգամ խնդրում էի, զգուշացնում էի, հուշում էի, որ չարժե նման դիրքորոշում ունենալ ոչ միայն ԼՂՀ հանրաքվեի վերաբերյալ գնահատականների, այլ նաև Ժիրայր Սէֆիլյանի հայտարարությունը ողջունելու, աջակցելու վերաբերյալ: Վերջին հարցազրույցում Բաբայանն ասաց, որ թող զգույշ լինեն իշխանությունները, ըստ էության, դա նշանակում է՝ եթե իրենք գնում են այս տարբերակով, մենք կդիմենք զենքի, և դա իրենց համար շատ ծանր հետևանքներ կունենա»:
«Կարծում եմ, որ Բաբայանը կյանքի բավականին հետաքրքիր և փառավոր ուղի է անցել, իրավունք չուներ նման վրիպումներ թույլ տալու,- նշեց Իսագուլյանը:- Հարգելով անմեղության կանխավարկածը, պետք է ասել, որ ցավոք, նա իրեն պահել է ոչ զգույշ, և միայն հետաքննությունը ցույց կտա, թե ինչ էր նախապատրաստվում կամ նախապատրաստվում էր, թե դա ուղղակի շատ էժան ձեռքբերված էր և պետք է տեղափոխվեր Արցախ՝ աջակցելու պաշտպանության բանակին»:
Իսագուլյանը նշեց, որ նման զենք ձեռք բերելը հնարավոր է. «Ի՞նչ եք կարծում՝ Ղարաբաղի ինքնապաշտպանության ջոկատները ո՞նց էին զինվում: Եթե կարողանում էին այն ժամանակ, ինչո՞ւ չեն կարողանա հիմա: Էսօր զենք կամ նման զենիթահրթիռային համակարգեր առնելը շատ հեշտ է»:
գառնիկ Իսագուլյանը կոչ արեց. «Որևէ մեկը սա թող չդարձնի քաղաքական շահարկումների թեմա»:
Մանրամասները՝ տեսանյութում: