Փետրվարի 16-ին Մյունխենում ԵԱՀԿ Մինսկի խմբի համանախագահները հանդիպել են Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հետ: Փետրվարի 17-ին Մինսկի խումբը հայտարարություն է տարածել:
Նշվում է, որ համանախագահները նախարների հետ քննարկել են հայ-ադրբեջանական զորքերի շփման գծում ստեղծված իրավիճակը: Մինսկի խումբը վերահաստատել է, որ Լեռնային Ղարաբաղի հակամարտությունը խաղաղ կարգավորման այլընտրանք չունի և կողմերին կոչ է արել զսպվածություն ցուցաբերել ինչպես տեղանքում, այնպես էլ հրապարակային հայտարարություններում և բնակչությանը նախապատրաստել խաղաղության և ոչ թե պատերազմի: Համանախագահները հակամարտող կողմերին նաև կոչ են արել խստորեն հետևել 1994-1995թթ. հրադադարի համաձայնագրին, որոնք հիմք են հանդիսանում ռազմական գործողությունները դադարեցնելու համար:
Համանախագահները շեշտել են, որ նախարարները պետք է պատրաստակամություն ցուցաբերեն և վերսկսեն համապարփակ բանակցությունները՝ որքան հնարավոր է շուտ կայուն կարգավորման հասնելու նպատակով:
ԵԱՀԿ Մինսկի խմբի համանախագահները ադրբեջանցի զոհված զինծառայողի դին վերադարձնելու Հայաստանի իշխանությունների որոշումը որակել են որպես մարդասիրակաան օգտակար քայլ: Նշվում է, որ երկու նախարարներն էլ վերահաստատել են իրենց միջազգային հումանիտար պարտականությունները կատարելու հանձնառությունը:
Համանախագահնրեն անդրադարձել են փետրվարի 20-ին Լեռնային Ղարաբաղում կայանալիք սահմանադրական հանրաքվեին։
«Համանախագահները տեղյակ են Լեռնային Ղարաբաղում 2017թ․ փետրվարի 20-ին տեղի ունենալիք այսպես կոչված սահմանադրական հանրաքվեի մասին ։Համանախագահները հաշվի են առնում , որ Լեռնային Ղարաբաղի դե ֆակտո նման ընթացակարգը դիտում են որպես իրենց բնակչության հանրային կյանքը կազմակերպելու ջանք, բայց կրկին ընդգծում են, որ որևէ երկիր, այդ թվում՝ Ադրբեջանը և Հայաստանը, Լեռնային Ղարաբաղը չեն ճանաչել անկախ և ինքնիշխան երկիր։ Հետևապես, համանախագահները չեն ընդունում փետրվարի 20-ի հանրաքվեի արդյունքների ազդեցությունը Լեռնային Ղարաբաղի վերջնական կարգավիճակի վրա։ Համանախագահները նաև շեշտում են, որ հանրաքվեի ելքը որևէ կերպ չի կանխորոշում Լեռնային Ղարաբաղի վերջնական կարգավիճակը կամ ընթացիկ բանակցությունների ելքը, որոնց նպատակն է Լեռնային Ղարաբաղի հակամարտության համար գտնել տևական և խաղաղ լուծում»:
Համանախագահները ծրագրում են մարտին այցելել տարածաշրջան:
