Օրերս ԱԻՄ-ը հանդես էր եկել հայտարարությամբ, որ ԱԻՄ-ը միանում է Օսկանյան-Օհանյան-Դալլաքյան դաշինքին: «Առաջին լրատվական»- ի հետ զրույցում ԱԻՄ առաջնորդ Պ. Հարիկյանը, անդրադառնալով հարցին, թե ինչ փուլում են աշխատանքները՝ դաշինքի ամբողջական կազմավորման առումով, մանրամասնեց. «Մենք ոչ միայն հայտարարեցինք, այլ նաև դիմում տվեցինք, և այժմ համարվում ենք դաշինքի մաս: Հանրությունն ակնկալում է որոշակի գործողություններ, այդ աշխատանքները կատարվում են, բայց դաշինքն ունի նրբերանգ. ով գնում է դաշինք, գնում է իր պատկերացումներով, իր ծրագրերով, բայց նաև պատրաստակամությամբ՝ հասկանալու դիմացինների մոտեցումները: Մեզ համար ամենակարևորը ժողովրդավարությունն է և այդ հարցում տարակարծություն չունենք»:
ԱԻՄ առաջնորդի համար սկզբունքային չէ այն հարցը, թե ով է գլխավորելու դաշինքի ցուցակը: «Եթե այս ընտրություններին որդեգրվի այն ռազմավարությունը, որը մենք ենք առաջարկում, ապա որևէ մեկի համար շատ կարևոր չպետք է լինի, թե ցուցակում ինքը որ տեղն է գրավում: Թիմով ենք գնում, և այդ թիմի հաղթանակի հասնելուց հետո ձեռքբերումը լինելու է բոլորինս: Սա մենք որպես ընտրություն չենք ընկալում, այլ որպես անցումային փուլ»:
Հարցին՝ համագործակցում եք այնպիսի քաղաքական գործիչների հետ, որոնց հասարակության ստվար զանգվածը մեղադրում է տարբեր հանցագործություններին, մասնավորապես Մարտի 1-ին առնչություն ունենալու մեջ, մտավախություն չկա՞, որ Ձեզ ևս կմեղադրեն նրանց հանցակիցը լինելու հարցում, Պարույր Հայրիկյանը պատասխանեց, որ եթե որևէ վախ ունենար, չէր մասնակցի քաղաքական գործընթացների և հավելեց. «Եթե ես որևէ արատավոր, բացահատվելու ենթակա գործունեություն ունենայի, այլևս չէի լինի քաղաքական գործիչ, որովհետև արդեն կլինեի կախվածության մեջ»:
«Ես ասում եմ՝ եկեք միասին պայքարենք ժողովրդավարության համար… Եթե դուք առանց դատարանի ձեզ դատավորի տեղ եք դնում, դա անթույլատրելի է: Ես չեմ ասում՝ որևէ մեկը սուրբ է, և չեմ հավակնում սրբեր փնտրել և աշխատել միայն նրանց հետ»,- ընդգծեց Պարույր Հայրիկյանը:
Նա նաև նշեց, որ ավելի լավ է ինչ-որ բան անել և սխալվել, քան ոչինչ չանել:
Մանրամասները՝ տեսանյութում: