2016թ. ԴԱԻՇ ահաբեկչական խմբավորումը կորցրել է Իրաքում և Սիրիայում իր վերահսկողության տակ գտնվող տարածքների մեկ քառորդը: Այս մասին հայտնում է BBC-ն՝ վկայակոչելով HIS Markit հետազոտական ընկերությանը:
«ԴԱԻՇ-ը 2016թ. կրել է աննախադեպ տարածքային կորուստներ, այդ թվում՝ կենսական կարևոր նշանակության շրջաններ»,- ասվում է ընկերության զեկույցում:
Հետազոտության համաձայն՝ Սիրիայում և Իրաքում իսլամիստների վերահսկողության տակ գտնվող տարածքները 2016թ. հունվարից մինչև տարեվերջ կրճատվել են՝ 78 հազար քառ. կմ-ից հասնելով 60.4 հազար: 2015թ. այդ տարածքները կրճատվել էին 90.8 հազարից մինչև 78 հազար:
Զեկույցում նշվում է, որ Մոսուլի ազատագրմանն ուղղված ռազմական գործությունները կարող են հաջողությամբ պսակվել առաջիկա մի քանի ամիսներին, մասնավորապես, «ընթացիկ տարվա երկրորդ կեսին»: Միաժամանակ, ընկերության գնահատականներով, առավել բարդ խնդիր է ԴԱԻՇ-ի մայրաքաղաք Ռաքքայի ազատագրումը:
«Ռաքքան ԴԱԻՇ-ի կենտրոնն է, քիչ հավանական է, որ նրանք կլքեն այն առանց կռվի: Հնարավոր է, 2017թ. քաղաքի ազատագրման համար կպահանջվի լուրջ ցամաքային գործողություն՝ հիմնական դերակատարների՝ ԱՄՆ-ի, Թուրքիայի և Ռուսաստանի, և Իրանի կողմից աջակցություն ստացող սիրիական կառավարական ուժերի մասնակցությամբ»,- ասվում է զեկույցում: