«Ամենակարևորը, որ մեզ տվեց 2016-ը, այն էր, որ մեզ հիշեցրեց, որ Ղարաբաղյան հակամարտությունը լուծված չէ: Մինչ այդ մենք ապրում, աշխատում էինք, շուրջ 20 տարի պետությունը գործում էր ենթադրությամբ, որ խնդիրը լուծված է, մնում է ժամանակ ձգձգել»: Այս մասին այսօր լրագրողների հետ հանդիպմանն ասաց քաղաքագետ Աղասի Ենոքյանը՝ հավելելով, որ ապրիլյան պատերազմը ցույց տվեց, որ այդպես չէ:
«Ապրիլյան պատերազմից հետո մենք ունեցանք ղարաբաղյան հակամարտության կարգավորման երկու փուլ, առաջին՝ երբ որ Հայաստանը փորձում էր Մինսկի խմբի, բարձր մակարդակով հանդիպումների միջոցով գալ խնդրի լուծման, իսկ երկրորդ փուլը եղավ սեպտեմբերից հետո, երբ որ Ադրբեջանն էր փորձում գալ լուծումների, իսկ Հայաստանը խուսափում էր հանդիպումներից: Հայաստանը ռազմական շքերթի ժամանակ ցույց տվեց «Իսկանդերներ»-ը, ինչը մեզ վստահություն ներշնչեց, որ մենք ունենք ռազմական գերակայություն Ադրբեջանի նկատմամբ, և Ադրբեջանը չի գնա հարցի ռազմական ճանապարհով լուծմանը: Սրանք էին հիմնական զագացումները: Կային նաև հարակից զարգացումներ, որոնցից է այն, որ տարածքներ զիջեցինք, այն, որ 2017-ին ընտրություններ են սպասվում, և ղարաբաղյան չլուծված խնդիրը կդառնա քննարկման թեմա, ինչը կարծես թե ժամանակի ընթացքում մարեց… Ըստ էության՝ կրկին կոնսենսուսի եկանք, որ մենք, այնուամենայնիվ, գնում ենք խնդիրը չլուծելու ճանապարհով»,- նշեց քաղաքագետը և անդրադառնալով ԵԱՀԿ գրասենյակի փակման հետ կապված վերջին զարգացումներին՝ ընդգծեց, որ Հայաստանը գնալով միջազգային ասպարեզում մարգինալացվում է:
Մանրամասները՝ տեսանյութում:
