«Բարգավաճ Հայաստան» կուսակցության նախկին նախագահ Ծառուկյանն այսօր անձամբ պատասխանել է քաղաքականություն իր վերադարձի մասին լրագրողների հարցերին՝ ըստ էության պահպանելով այն անորոշությունը, որ կար մամուլի հրապարակումներում:
Ծառուկյանը փաստորեն առնվազն չի հերքել իր վերադարձի մասին տեղեկությունները, որ մամուլում շրջանառվում են երկար ժամանակ: Ավելին՝ Ծառուկյանն իր որոշ հայտարարություններով ըստ էության խորացրել է ինտրիգը՝ հայտարարելով, որ ինքը ներողամիտ մարդ է, նենգ չէ, և բոլոր գործիչները թող իմանան այդ մասին:
Ո՞ւմ է ներում Գագիկ Ծառուկյանը, ո՞ւմ է հայտնում իր ներողամտության մասին: Իհարկե, այս պոտենցիալ գործիչների շրջանակը շատ մեծ է, քանի որ 2015 թվականի փետրվարին Գագիկ Ծառուկյանին ըստ էության բոլորը լքեցին՝ սկսած նրան հայկական Իվանիշվիլի հռչակած առաջին նախագահից, մինչև նրա քաղաքական հաջողություններով ուրախացող երկրորդ նախագահը, որոնք մատը մատին չխփեցին, երբ Սերժ Սարգսյանը Ծառուկյանի համար ըստ էության վիրավորական, անհարգալից կերպով նրան հեռացնում էր քաղաքականությունից: Իրենց քաղաքական ապագան Ծառուկյանի հաշվին և Ծառուկյանի կողքին կառուցողներից և ոչ մեկը փորձ իսկ չարեց նրա թիկունքին կանգնելու:
Մյուս կողմից՝ Ծառուկյանի ներողամտության կարիքն ունեն նաև այն հանրապետականները, որոնք ՀՀԿ-ում Սերժ Սարգսյանի հայտնի ելույթից հետո նրան «բամփում» էին և դիմում այն մականունով, որը մինչև 2015 թվականի փետրվար արգելել էր կիրառել Սերժ Սարգսյանը: Այսինքն՝ այդ շրջանակը սկսում է Ծառուկյանի խնամի Հովիկ Աբրահամյանից մինչև երիտհանրապետականները:
Ինչ վերաբերում է Սերժ Սարգսյանին, ապա նրա հետ խնդիրները Գագիկ Ծառուկյանը կարծես թե պարզել է շատ վաղուց, և դրա մասին վկայում են այն ջերմ հարաբերությունները, որով Ծառուկյանն ու Սերժ Սարգսյանը մասնակցել են մի շարք հանրային միջոցառումների, մինչև անգամ Ռիոյի օլիմպիադայի Հայաստանի համար ոսկե ակնթարթներին:
Եվ այս տեսանկյունից պետք է ենթադրել, որ ներողամտության մասին խոսքերում Ծառուկյանը Սերժ Սարգսյանին նկատի չուներ: Եվ ուրեմն այս տեսանկյունից խնդրի ենթատեքստում թաքնված կոդերը կարծես թե վկայում են, որ Ծառուկյանի վերադարձը եթե տեղի ունենա, ապա կարող է տեղի ունենալ այն կոնտեքստում, որը ենթադրելու է նրա գործունեություն կամ քաղաքական գործոնի դրսևորում այն շրջանակների դեմ, որոնք մնում են Ծառուկյանի «ներողամտության» հասցեատիրոջ կարգավիճակում:
Թե հատկապես որ «հասցեն» կթիրախավորի Ծառուկյանն իր վերադարձի դեպքում՝ դեռևս մնում է ինտրիգ, սակայն պոտենցիալ տեսանկյունից նա կարող է թիրախավորել ոչ միայն ցանկացած հասցե, այլև ըստ էության միանգամից շատ հասցեներ և նույնիսկ բոլորը:
Այստեղ ներկայումս էականը այն է, որ Ծառուկյանը փաստորեն ակնարկել է, որ իր վերադարձի պարագայում հասցեների ցանկում այլևս չի լինելու Բաղրամյան 26-ը: Առավել ևս, որ Ծառուկյանը սատարել է այդ հասցեից նշանակված վարչապետ Կարեն Կարապետյանին:
Լուսանկարը՝ Photolure-ի
