Այսօր մամլո ասուլիսով հանդես եկավ ՀՀ նախագահ Սերժ Սարգսյանի աշխատակազմի ղեկավարի տեղակալ և Ազգային ժողովում ՀՀ նախագահի պաշտոնական ներկայացուցիչ Վիկտոր Դալլաքյանը և հայտարարեց ՀՀԿ-ից դուրս գալու մասին:
Վ. Դալլաքյանը անդրադարձ կատարեց նաև 2012-ի ընտրություններին: Դալլաքյանը նշեց, որ իբրև թե նախագահ Սերժ Սարգսյանի և Էդմոն Մարուքյանի միջև պայմանավորվածություն է եղել և իբրև թե օրենքի խախտմամբ Վիկտոր Դալլաքյանի փոխարեն Էդմոն Մարուքյանն է պատգամավոր ընտրվել:
«Լուսավոր Հայաստան» կուսակցության նախագահ Էդմոն Մարուքյանը, անդրադառնալով այս և մի շարք այլ դիտարկումների, նշեց. «Ես մեծ ջանքեր եմ գործադրում, որպեսզի լուրջ դեմք ընդունեմ և լրջորեն մեկնաբանեմ Վ. Դալլաքյանի ասածը: Չէի հետևում ասուլիսին, Վանաձորից բազմաթիվ զանգեր ստացա, մարդիկ ասում էին. «Վիկտոր Դալլաքյանին քաղաքական դիակների սառնարանից հանել են, ուղարկել են քաղաքական դաշտ»»:
«Այն ինչ, որ հիմա ասում է Վ. Դալլաքյանը, 4 տարի է ասում է, սրա-նրա անունով հոդված տպելով և այլն, այս ընտրություններին էլ աջակցել է Մ. Ասլանյանին: Ես ուրախ եմ, որ հիմա ինքն է անձամբ այդ մասին ասում և կարող եմ իրեն պատասխանել»,- նշեց Էդմոն Մարուքյանը և ներկայացրեց մի շարք հակափաստարկներ՝ ընդդեմ Դալլաքյանի դիտարկումների:
Մարուքյանն անդրադարձավ Դալլաքյանի այն դիտարկումներին, թե իբր Մարուքյանը 2012-ի ընտրություններին տեղեկանք է կեղծել եւ այդ ճանապարհով պատգամավոր դարձել։ Մարուքյանը հղում կատարելով ընտրական օրենսգրքին, նկատեց, որ արտերկրում ուսանելը որեւէ խոչընդոտ չէ պատգամավորության թեկնածու առաջադրվելու համար։ Պատգամավորը նաեւ նշեց, որ Դալլաքյանը օրենք է խախտել, եւ իր ու իր ընտանիքի անձնական տվյալները հանել ու հրապարակել է մամուլում, որը օրենքի կոպիտ խախտում է։
Ինչ վերաբերում է Դալլաքյանի մյուս պնդմանը, թե Մարուքյանը Սերժ Սարգսյանի հետ հանդիպում է ունեցել եւ դրա արդյունքում է պատգամավոր դարձել, Մարուքյանը նկատեց, որ Դալլաքյանը ստում է։ Ինքը մեկ անգամ է նախագահականում եղել, եւ դա հայտնի փաստ է, հրապարակված լուսանկարն էլ առկա։ Դա եղել է սահմանադրական բարեփոխումներից առաջ։ «Լավ կլինի Դալլաքյանը պատասխան տա, թե ինչպես էր ժողովրդին համոզում, որ «Սերժ Սարգսյանը
«Մարդը կարող է 4 տարի օգտվել պետական ռեսուրսից, ծառայել Ս. Սարգսյանին, իր ամբողջ ընտանիքին, բարեկամներին տեղավորել աշխատանքի, և հետո ասել՝ ես դուրս եմ գալիս ՀՀԿ-ից, նոր կուսակցություն եմ ստեղծում: Ես հավաստիացնում եմ, որ նա գործուղված է դաշտ, որպեսզի ապականի քաղաքական համակարգը, որովհետև տեսնում են, որ նոր ուժեր կան քաղաքական դաշտում, և ուղարկել են, որ նա իր գործառույթներն իրականացնի, բայց նա այլևս չի կարող: Կարծում եմ՝ Բաղրամյան 26-ում չեն հաշվարկել, որ այդ մարդու պիտանելիության ժամկետն անցած է»,- ընդգծեց Է. Մարուքյանը՝ հավելելով, որ նրան լսելիս որևէ մեկը այլ բան չի հիշում, քան այն, որ նա ուզում էր իր կոստյումն ուղարկել Վանաձոր և այդպես ընտրվել, և վանաձորցիներն իրեն էլ, իր կոստյումն էլ հետ ուղարկեցին այնտեղից:
Մանրամասները՝ տեսանյութում: