Վինիպեգում տեղի է ունեցել մամլո ասուլիս, որի ժամանակ ներկայացվել է, որ կրի ժողովրդին պատկանող 2 կանադացի 41 տարի ապրել են օտար ընտանիքներում: Նրանց շփոթել են հիվանդանոցում՝ 1975 թվականին ծնվելուց հետո, հայտնում է CBC News-ը:
Միջոցառման ժամանակ հայտարարել են ԴՆԹ թեստի արդյունքները, որոնք ցույց են տվել, որ Լեոն Սվենսոնը և Դևիդ Թեյթ կրտսերը դաստիարակվել են ոչ իրենց կենսաբանական ծնողների մոտ: Դա իմանալով՝ նրանք հազիվ են զսպել արցունքները:
«Մենք բառեր չենք գտնում: Անցել է 41 տարի… Ես պարզապես շփոթված եմ, վրդովված և չարացած»,- հայտարարել է Թեյթը: Ավելի ուշ նա նշել է, որ իրեն մեծացրած մարդկանց միշտ կհամարի ծնողներ, սակայն այժմ նա էլի ծնողներ և եղբայր ունի: Նրա խոսքով՝ Թեյթերը և Սվենսոնները որոշել են շփվել որպես մեկ մեծ ընտանիք:
