«Քրիստոնեա-ժողովրդական վերածնունդ» կուսակցության նախագահ Սոս Գիմիշյանն «Առաջին լրատվական»- ի հետ զրույցում կարծիք հայտնեց, որ Հայաստանի իշխանությունները բացարձակ ադեկվատ չեն արձագանքում ստեղծված իրավիճակին. «Որևիցե քայլ, գործողություն չեմ տեսնում, որը կմեղմացներ այս լարվածության աստիճանը և երկիրը կառուցողական հուն կտաներ, հիմնականում կա՛մ բացարձակ անգործության են մատնված՝ նախագահը օլիմպիական խաղերի է մասնակցում, երբ երկիրն այս վիճակում է և մեր շրջապատում ծանրագույն, լուրջ գործընթացներ են տեղի ունենում, կա՛մ կատարվող բոլոր քայլերը դեստրուկտիվ են: Այնպիսի վիճակ է ստեղծվել, որ նույնիսկ Հանրապետական կուսակցության պաշտոնյաների մեծ մասը հասկանում և խոսում է այն մասին, որ ծանրագույն վիճակ է ստեղծվել երկրում»:
Արտաքին խնդիրներին անդրադառնալով՝ Սոս Գիմիշյանը նշեց. «Սիրիայում լուրջ գործընթացներ են, Թուրքիան ակտիվանում է իր քայլերով, սա բերելու է նրան, որ ահռելի մեծ զանգված է տեղափոխվելու Թուրքիան, որտեղից էլ նրանց մի մասը տեղափոխվելու է Եվրոպա, մյուս մասը Հարավային Կովկաս, որտեղ մենք վտանգավոր, չպաշտպանված սահմաններ ունենք Նախիջևանի կողմից, հայ-վրացական սահմանը նույնպես պաշտպանված չէ»:
«Այս իրավիճակում իշխանության կողմից որևէ քայլ չեմ տեսնում»,- նշեց Ս. Գիմիշյանը: Նրա կարծիքով՝ Սերժ Սարգսյանը պետք է հրաժարական տա, և վստահության կառավարություն պետք է ստեղծվի, որում, ըստ Գիմիշյանի, պետք է ներգրավվեն համայն հայության կարող ուժերը, և դա դառնա առաջի քայլերից մեկը, որը կամբողջացնի հայ ժողովրդի ներուժը:
«Ես հստակ գիտեմ,որ սպանելու, կրակելու, ոչնչացնելու միջոցով որևիցե բան չի փոխվելու, լավ, վերացրինք Սերժ Սարգսյանին, վերացրինք իշխանությունը, 2-3 ամիս հետո ընտրություն է լինելու, ընտրական համակարգը գիտենք ինչպիսին է, գիտենք ինչպիսի արտաքին ազդեցություն կա ընտրական համակարգի վրա, ովքեր են որոշում, թե ով պետք է ընտրվի, նրանք կորոշեն՝ Սերժ 2-ին կնստացնեն, և ոչ մի բան չի փոխվի»,- իր կարծիքը հայտնեց Ս. Գիմիշյանը: Նրա խոսքով՝ հասարարական պատվեր կա, որ պետք է ոչնչացնել այս իշխանությունը, անկախ նրանից, թե հետո ինչ կլինի, գուցե դա մի փոքր դաս լինի հաջորդ սերունդների համար:
Մանրամասները՝ տեսանութում: