«Ի՞նչ փուլում են Սարի թաղի դեպքերից տուժած քաղաքացիների և կալանավորվածների գործերը» թեմայով ասուլիս-քննարկմանը «Սասնա ծռեր» խմբի փաստաբանական խմբի ներկայացուցիչ Ինեսսա Պետրոսյանը, անդրադառնալով Վերաքննիչ քրեական դատարանի կողմից իր պաշտպանյալների խափանման միջոցը փոխելու վերաբերյալ միջնորդության մերժման հիմքերին, նշեց, որ մերժման հիմքում դրվում են այն պատճառաբանությունները, որ իրենց մեղսագրված են ծանր արարքներ, և ազատության մեջ գտնվելով նրանք կարող են խոչընդոտել գործի քննությունը. «Ամեն դեպքում, որոշումները պարտադիր բողոքարկելու եմ Վճռաբեկ դատարանում, մասնավորապես՝ Պավլիկ Մանուկյանի մասով կարող եմ ասել, որ ակնհայտ է, որ նա նախաքննությունը խոչընդոտելու հնարավորություն չունի՝ հաշվի առնելով նրա առողջական ծանր վիճակը»:
Փաստաբանը տեղեկացրեց, որ այսօր այցելել է դատապարտյալների հիվանդանոց, որտեղ ականատես է եղել մտահոգիչ, մարդու իրավունքների խախտման խնդրի: Նրա խոսքով՝ նախկինում Էրեբունի բ/կ-ի կողմից բուժակների 24-ժամյա հերթապահություն էր նշանակվել, սակայն այսօրվանից հերթապահությունը դադարեցվել է:
«Դատապարտյալների հիվանդանոցում 7 հիվանդ կա, որոնք տեղափոխվել էին Էրեբունի ԲԿ-ից, եւ այնտեղ անձինք կան, որոնք պետք է գտնվեն վերակենդանացման բաժանմունքում: Երկուշաբթի օրվանից նախատեսված են վիրահատություններ, յոթն էլ վիրահատության կարիք ունեն, ընդ որում, պլանային վիրահատություններ պետք է լինեն, շարունակական»,- ասաց փաստաբանը:
«Ժառանգություն» կուսակցության խոսնակ Դավիթ Սանասարյանի պաշտպան Արա Ղարագյոզյանը հայտարարեց, որ Սանասարյանի խափանման միջոցը փոխելու որոշումը դատարանի կողմից բավարարելը քաղաքական որոշում է:
«Որևէ դատավոր օրենքով չի ղեկավարվում, իսկ քրեական գործը դեռ չի կարճվել, իբր նախաքննություն է ընթանում»,- նշեց պաշտպանը՝ հավելելով, որ քրեական հետապնդումը դադարեցնելու միջնորդությամբ է հանդես գալու, քանի որ որևէ հանցակազմ չի եղել իր պաշտպանյալի գործողություններում:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն ընդգծեց, որ երեք խմբերի նկատմամբ են կիրառվել ապօրինություններ, առաջին խումբը՝ հավաքների մասնակիցներն են, որոնք գտնվում են կալանքի տակ՝ նրանց նկատմամբ քրեկական գործ է հարուցվել զանգվածային անկարգությունների կազմակերպման հիմքով, մյուս խումբը քաղաքական գործիչներն են, նույն հիմքով նրանց նկատմամբ է գործ հարուցվել, գիտենք, որ նրանցից երկուսն ազատ են արձակվել, խափանման միջոցը փոխվել է, նրանց նկատմամբ քրեական հետապնդումը շարունակվում է, երրորդ խումբը, որոնց թվում է նաև Կարո Եղնուկյանը, «Սասնա ծռեր» զինված խմբին օժանդակելու մեջ մեղադրվողներն են :
«Եթե դիտարկենք այս հիմնական խմբերի նկատմամբ ոստիկանության և ընդհանուր իրավապահ համակարգի կողմից գործողությունները, ակնհայտ է տրամաբանության բացակայությունը. սելեկտիվ արդադատությունն ակնառու է: Հիմնական տենդենցը, որն ընդհանուր է, ապօրինի հետապնդումն է»,- ասաց Արթուր Սաքունցը:
Նա կարևորեց ԵՄ գրասենյակի, ԱՄՆ դեսպանատան ու պետդեպարմենտի, Եվրախորհրդի գլխավոր քարտուղարի հայտարարությունները, որոնք դատապարտում են ոստիկանների գործողությունները «ԵԱՀԿ դեսպանի գնահատականը տարօրինակ էր, որ ոստիկանության գործողությունների վերաբերյալ դրվատանքի խոսքեր հնչեցրեց, բայց դա այլ քննարկման թեմա է: Անձամբ ես գտնում եմ, որ տեղի ունի ակնհայտ քաղաքական հետապնդում՝ բացի Սասնա ծռերից՝ մնացած բոլորի նկատմամբ, այդ գործով անազատության մեջ գտնվող բոլորի խափանման միջոցը պետք է փոխվի ու դադարեցվի քրեական հետապնդումը»:
Իրավապաշտպանի կարծիքով՝ պետք է ոստիկանապետի ու իր տեղակալների նկատմամբ քրեական հետապնդում հայտարարվի, ներառյալ նաև այն ոստիկանների, որոնց ապօրինի գործողություններն ակնհայտ են բոլոր տեսանյութերում: «Սակայն, մենք չենք տեսնում ՀՔԾ-ի կողմից ջանքերը՝ ուղղված ոստիկանության ապօրինի գործողությունների դեմ»,- ընդգծեց Ա. Սաքունցը:
«Իրավունքների պաշտպանություն առանց սահմանների» ՀԿ-ի ղեկավար Հայկուհի Հարությունյանը նկատեց, որ դատարանի կողմից կայացրած որոշումները քաղաքական են: «Կոչ եմ անում բոլոր քաղաքացիներին, ովքեր հուլիսի 17-31-ը ոստիկանության գործողությունների արդյունքում տուժել են, եթե նրանց հարցաքննության վերաբերյալ հրավեր ուղարկեն քննչական կոմիտեի կողմից, դիմեն մեզ կամ այլ իրավաբանների, որպեսզի պահանջենք, որ հարցաքննությունը իրականացվի ՀՔԾ-ի կողմից»,- ասաց Հ. Հարությունյանը:
Մանրամասները՝ տեսանյութում:
Լուսանկարը՝ Photolure-ի