Ինչպես հայտնի է, հուլիսի 29-ի դեպքերի կապակցությամբ ձերբակալվեց նաև երաժիշտ Եղիշե Պետրոսյանը, որի գործը ավելի ուշ կասեցվեց հանցակազմի բացակայության պատճառով:
Մեր զրուցակցի համոզմամբ՝ հուլիսի 29-ի սադրանքը, որը կազմակերպվեց Սարի թաղում, կարող էր կազմակերպվել նաև Խորենացիում, այսինքն՝ կապ չուներ վայրը. «Ոստիկանությունը և նրա թիկունքում թաքնված քաղաքացիական հագուստով խուժանը պատրաստ սպասում էր այդ սադրանքին»:
Ինչ վերաբերում է «Սասնա ծռերի» տղաներին, ապա մեր զրուցակիցը համարում է, որ տղաները ոչ թե հանձնվեցին, այլ պարզապես վայր դրեցին զենքը:
«Ապրիլյան դեպքերից հետո անգամ Հայաստանի իշխանությունները դարձի չեն գալիս, ուստի այս ամենը հղի է անկանխատեսելի հետևանքներով»,- «Առաջին լրատվական»-ի հետ զրույցում ասաց Եղիշե Պետրոսյանը:
Լեռնային Ղարաբաղի շրջանները հանձնելու մասին խոսակցությունները, մեր զրուցակցի կարծիքով, բերում են բարոյալքման, ինչի պատճառով էլ առանց կռվի հանձնվեց Կարսը. «Մենք պետք է գործոն լինենք ինքներս մեզ համար, և ոչ մեկին թույլ չտանք մեր փոխարեն վճիռներ կայացնել»:
Եղիշե Պետրոսյանը Հայաստանում այսօրվա ստեղծված օրհասական վիճակը համեմատելով Հայոց ցեղասպանության հետ՝ ասաց, որ այն ժամանակ ևս 1.5 մլն զոհ ունենալու պատճառը եղավ անտարբերությունը. «Սա ազգային խնդիր է, դասալիք չպետք է լինել, իսկ պատերազմը ամեն դեպքում անխուսափելի է: Սա ազգային-ազատագրական պայքար է, ու պիտի պայքարենք՝ թեկուզ մեռնենք»:
Դիտարկմանը՝ կարծիքներ կան, որ «Սասնա ծռերը» իշխանական պրոյեկտ էր կամ դրսի ուժերի կողմից կազմակերպված, Եղիշե Պետրոսյանն ասաց. «Իմ գնահատմամբ՝ սա ոգու ճիչ էր և արդարացված, որովհետև նորմալ իշխանություն ձևավորելու սահմանադրական բոլոր ձևերը ամբողջությամբ սպառվել են: Ես էլ ասում եմ, որ մեր իշխանությունները ռուսական պրոյեկտ են, ինչին ես դեմ եմ»:
Մանրամասները՝ տեսանյութում:
